من حوارات منكوب و منهوب .. 11

عمران كيالي

منكوب :  اليوم تسكرت معي خالص .. ما عم أقدر أكتب و لا كلمة

منهوب :  له له .. ليش ؟..

منكوب :  ما بعرف يا خيو .. فقت بالليل مشوب .. بدي أصب طاستين .. ما في مي .. بدي أشرب بق .. ما في .. بدي غسل وجي .. ما في .. و أنا عم بحبش بالعتمة تفشكلت بقنينة الحصرم .. منيح ما انكسرت .. وأنا طالع من المطبخ طبشت راسي بالباب ..

منهوب (مقاطعاً) :  منيح .. هاي صار عندك حكاية تحكيها .. يا الله .. مسيك القلم و بلش ..

منكوب :  في شغلات يا منهوب ما بتنكتب .. ممكن تنحكا بس ..

منهوب :  إش علي إذا كتبتا .. يعني تغيير شكل .. ما حاج كتابات عن الإشتباكات و المؤتمرات الفاضية ..

منكوب :  أصلا العالم قرفت كل شي .. ما عاد حدا يقرأ متل قبل ..

منهوب :  إي و الله .. بتتذكر أول .. لما كان يطلع ديوان جديد لمحمود درويش أو نزار قباني .. كل الشباب يروحو ع المكتبات و بعدين يقعدو بمقصف الجامعة ساعات يحكو عن الشعر و الأدب و الشيخ إمام و مارسيل خليفة ؟..

منكوب :  إي لكان بتذكر .. و الله كانت أيام .. منهوب : و لما إجا محمود درويش على مدرج كلية الطب .. منكوب : بتذكر كمان ..

منهوب :  و لما إجا مارسيل خلفة على الصالة الرياضية .. و ياس خضر ..

منكوب :  دخيلك لا تفتقلي جروحاتي .. عيفني بهمي .. بكرا إذا خلصت جرة الغاز ما بعرف منين بدي دبر بدالها ..

منهوب :  يا حيف يا منكوب يا حيف ..

منكوب :  عيفا على الله أحسن شي ..

منهوب :  إي ضربلك صحبة مع شي شبيح بركي بدبرلك جرة غاز ..

منكوب :  هلق شوب وين كنا .. وين صرنا .. كنا عم نحكي ع الأدب صرنا عم نحكي بالمشاكل اليومية ..

منهوب :  هيك العادة .. بس انحلت مشاكلنا اليومية بصير عنا وقت نحكي بالأدب و السياسة .. لذلك لازم نبقى راكضين ورا لقمة العيش .. حتى البطران يضل بطران ..

منكوب :  و الطفران يضل طفران ..