من حوارات منكوب و منهوب (13) …

من حوارات منكوب و منهوب (13) …

عمران كيالي

منهوبة : جاي على بالي أعمل تبولة المسا ..

منهوب : ما شاء الله عليك، نسيتي إنو نحني في مرحلة تقشف ..

منهوبة : إي و الله تعبنا يا رجال، طلع على حالك، صاير عضمه و جلده، كل يوم زيت و زعتر ..

منهوب : خلص، بطلت، من هلق و رايح زعتر و بس ..

منهوبة : أنا ما قصدي تبطل أكل الزيت، قصدي نغير شكل، قوم جيب بندورة و بقدونس و ليمون، بصل في و برغل في ..

منهوب : طيب، تعي نحسبا، كيلو البندورة 200 ليرة، باقتين بقدونس 150 ليرة، نص كيلو ليمون قولي 100 ليرة، هاي صارو 450 ليرة، فحل بصل و خرخورة زيت و كمشة برغل و ملح و الذي منو فوق ال 100 ليرة، يعني جاط التبولة طف ال 500 ليرة بالميته، يعني يوميتي طارت ..

منهوبة : إش عليه يعني، إي و الله صار معي كتام من الزعتر، بعدين اليوم عيد، خلينا نحتفل ..

منهوب : و الله غلبتيني يا مرا، إن كيدكن عظيم ..

شرح الكلمات :

– صاير عضمه و جلده يعني ضعفان

– من هلق يعني منذ الآن

– فحل بصل يعني بصلة كبيرة

– خرخورة زيت يعني قليلا منه

– كمشة برغل يعني كمية منه ملء اليد

– و الذي منو يعني بعض الأشياء الأخرى

– جاط يعني صحن كبير

– طف يعني زاد عن أو تجاوز

– بالميته يعني على الأقل

– يوميتي يعني إجرتي في اليوم الواحد

– شو عليه يعني أين المشكلة ؟

– الكتام يعني صعوبة التبرز ..

  • Social Links:

Leave a Reply