الفقرة ( 20 ) من حوارات منكوب و منهوب .. ( بيضة القبان ) ..

عــمــران كــيــالــي 

منكوب : يا سيدي أنا بطلت أحكي باللغة الفصحى ..

منهوب : له .. ليش ؟..

منكوب : أولا : اللغة الفصحى صعبة علي .. تانيا : في أفكار براسي إذا حكيتا بالفصحى ما رح تظبط معي و ما رح توصل ..

منهوب : متل إيش يعني ؟..

منكوب : مثلا واحد عاطل، إذا قلت عنو إنسان سيء رح تكون قليلة عليه .. بس إذا قلت عنو زنوة أو ابن حرام رح تكون عطيتو حقو و الوصف المظبوط ..

منهوب : متل مين ؟..

منكوب : آآ هووووو .. ما في أكتر منهم عندك تاجر الأسلحة، تاجر المخدرات، المنافق، الفتنجي، المصلحجي، العرصة ….

منهوب : بس إذا كتبت بالعاميه ما رح يفهم عليك كل الناس .. يعني اللهجة الحلبية مو مفهومة تماما في مدن و بلدان تانيه ..

منكوب : إي و الله كلامك صح .. معناها لازم نعمل شرح كلمات بآخر كل حوارية ..

منهوب : إي لكان ضروري .. خاصة إنو حلب صايرة حديث الساعة .. متل سيرة الحية ما عم تخلص ..

منكوب : معلوم سيدي .. صارت بيضة القبان ..

منهوب : قال عملوها عاصمة للسينما ..

منكوب : و كل المحطات الفضائية ما إلها سيرة غير حلب .. إش أغاني و إش برامج و إش لقاءآت ..

منهوب : مو ناقص غير يعملو مباراة بكرة القدم بين فريق المسلحين و فريق كتائب أبو الفضل ..

منكوب : ولك يتركونا بهمنا و ألف خير من الله ..