مكافحة الكفر والكفار  ــ الخال أبو رفعت – كفرنبل

مكافحة الكفر والكفار ــ الخال أبو رفعت – كفرنبل

 

مبارحا قالتلي خالتكن أم رفعت مابتروح لنشم الهوا ونشوف هالأرض ونشربلنا كاسة شاي عالحطب وناخدلنا شوية بزر نتذكر شبابنا ونبعد شوي عن هالطيران قلتلها إي والله جبتيها والله حطيت هالشملة البيضا المكوية وهالعكال على راسي وأم رفعت لبست هالشال الأخضر صرنا متل العرسان وركبنا على هالموتور وقلنا ياالله ونحنا ماشين على هالطريق نتجاذب أطراف الحديث ماشفنا إلا بيكابين دبل كبين مركب عليهن هالرشاش التلاتاوعشرين مجوز ومليانات مسلحين ملتمين ومتل البرق واحد صف قدامنا وواحد ورانا وقفونا ونزلوا هالشباب متل النمورا وكل واحد معو بارودة عبتلمع وأخذوا وضعية الرامي المتأهب كالأسد الذي سينقض على فريسته ياشباب أنا نشف دمي وأم رفعت تدمدم وتلكشني فخاصرتي وتقلي شقد قلتلك لابقى تحكي عليهن زبط لشوفك وبكلامها نبرة من التشفي قلتلهن خير ياشباب نط واحد مبين علي الأمير والقنابل تزين صدره وبعد أن تمعن النظر بي تارة وبأم رفعت تارة أخرى قال لا تواخذنا ياشيخ فكرناك شايل علم الكفر تاري الشملة البيضة إلي أنا لابسها مع شال أم رفعت الأخضر مبينات من بعيد متل علم الثورة عبرفرف على هالهوايات ونحنا راكبين هالموتور المهم أنا وخالتكن أم رفعت ماضل فينا ضنا وعدنا على أعقابنا خائبين قامت أم رفعت قالتلي هود أشو عبيعملوا هون قلتلها عبيقمعوا علم الكفر قالتلي و ليش مابروحوا على حلب بيقمعوا الكفر نفسو .

  • Social Links:

Leave a Reply