أنت تطالب بالدولة الإسلامية وبتحكيم شرع الله ــ الخال أبو رفعت – كفرنبل

أنت تطالب بالدولة الإسلامية وبتحكيم شرع الله ــ الخال أبو رفعت – كفرنبل

 

يا أخي الكريم أنت مين عبطالب بس فهمني..؟؟

إذا عبطالبنا نحنا والله نحنا مطبقينها متل أيام الصحابة من بأدن منسكر دكاكينا ومنروح على الجامع ونسوانّا بتمشي في الشارع متل القاموع الأسود وكلياتنا ربّينا دقونّا وقصرنا لباسنا ومْنقول لا إله إلا الله محمد رسول الله على علات صوتنا ومنصوم ومندفع زكاة وإذا صار معنا مصاري منروح عالحج وإسى كل النهار مندعي للمجاهدين .

بس أنت ياأخي المجاهد شايل بارودتك ولابس لتامك ومانا عمنعرفك مين أنت شي أبو تراب وشي أبو قتادة وشي أبو آية ومن أين أنت وكيف جيت لعنا مانا عرفانين وتارك بلادك وضيعتك عبيسرحوا فيها الكفار وإسى فاتح عنا سجون ومعتقلات إلي بيحكي عليكن كلمة عالفيس بتشحطوه وإلي بعارضكن بحرف بتشحطوه وكل النهار بتعطينا مواعظ في الدين والأخلاق وعامل حالك أفهم من كل هالبشر أنت الشيخ والأمير والمدير والقائد والمقاتل والمجاهد .

إذا بدك تطبيق الشريعة وإقامة الدولة الإسلامية أول الشي إكتشف أو لاحق جريمة قتل وحدة بس من مئات الجرائم إلي عبتصير كل يوم أو قطاع إيد إلي سرق سكة الحديد من إدلب للجسر أو إلي سرق محطة زيزون أو إلي سرق معامل إدلب .

إذا بدك دولة إسلامية روح أول الشي قاتل الكفار إلي حواليك من كل جهة مهو مقراتك منتشرة بين بيوت الناس وكل النهار شايل بارودتك في الشارع .

إذا بدك دولة إسلامية خلي أميرك أمير المؤمنين يعمل متل سيدنا عمر يدور من شباك لشباك ومن خيمة لخيمة ويشوف مين في من الرعية جوعان او بردان .

إذا بدك دولة إسلامية روح شوف هالمسلمين إلي حابسهن و حاطتهن تحت الأرض بدون ذنب وبدون محاكمة .

إذا بدك دولة إسلامية أمّن كهربا ومي وطحين وماظوت ومدارس وجامعات وفتاح مشاريع ومعامل لتشتغل الناس .

إذا بدك تطبيق الشريعة الإسلامية وإقامة دولة الخلافة إشتغل متل ماأمرك الشرع ومتل ماإشتغلوا الخلفاء .

بس إشتغلت هيك لحالها بتصير دولة إسلامية . . . .

  • Social Links:

Leave a Reply