أسد نباتي

أسد نباتي

رؤى عبد الصمد
اجتمعت حيوانات المزرعة يوما” ، و اشتكت لصديقها الانسان ، لماذا نصب الاسد علينا ملكا” للغابة ، دون ان نختاره نحن او ننتخبه ، الاسد حيوان متوحش مجرم قاتل ، اوغل قي دمائنا نحن الحيوانات البريئة الوديعة ، نريد تغيير هذا الحال بمساعدتك ايها الانسان الطيب ..
فكر الانسان بكلام الحيوانات ، صحيح ، كلامهم معقول ، استعرض في خياله ( و على اليوتيوب أيضا” ) قصص اصطياد الاسد المتوحش لصغار الغزلان و الحملان ، للثيران الوادعة و هي تقطع النهر ، للزرافات الجميلة و هو يعترض طريقها دون رحمة ..فعلا” يجب ان تتوقف هذه الكارثة ، لماذا هو ملك الغابة ؟! ساساعد أصدقائي الحيوانات و أخلع عنه هذا اللقب ، و نكلف حيوانا” آخر اكثر لطفا” و أقل إجراما” بإدارة أمور الغابة ..
دعا الانسان اصدقاءه الحيوانات و اخبرهم بوقوفه إلى صفهم ضد هذا المجرم المتغطرس ، ثم طلب منهم ان يختاروا فيما بينهم ملكا” جديدا” للغابة ليدعمه و يسلمه مقاليد الحكم بدلا” من الاسد الفاجر المتوحش ..
اجتمعت حيوانات المزرعة لتختار بديلا” مناسبا” عن الاسد ، و جرى بينهم الحوار التالي (بتصرف ، فانا لا اجيد تماما” لغة الحيوانات ) .
النعجة : أصدقائي حيوانات المزرعة ، اشكر لكم حضوركم ، و باسمكم اتوجه بالشكر الجزيل لصاحبنا الانسان على عرضه الكريم بالوقوف إلى جانبنا ، في صراعنا الازلي مع الاسد المتوحش ، و ابتدأ باسمكم افتتاح الجلسة لاختيار بديل للأسد السفاح ، و انا اقترح في البداية على من يجد في نفسه الكفاءة لهذا المنصب ان يرشح نفسه ، ثم نجري عملية انتخاب نزيهة فيما بيننا لانتخاب الاكفأ لقيادة المرحلة القادمة …باع .. باع ..باع ..
( الحيوانات تضرب بقوائمها الارض ترحيبا” و استحسانا” لكلمة النعجة ،تصدر ايضا” اصوات مختلطة للحيوانات كهتافات ، باع ..ماع ..كوكو كو ..هيهي هيهي هاء هاء ..امم امم… أو أو ..)
الديك : يسرني انا أن اقدم نفسي كمرشح لهذا المنصب ، و ارجو ان انال ثقتكم .
الكبش : (يلتفت إلى الحمار الذي يجلس بقربه ) هل تسمع ؟! ليش شو اخي ما بقي غيرك لتصير ملك علينا
الديك : ليش خيو ، ليش ماني معبي عينكم ؟!
الحمار : إي مو لنشوفك بالاول لتعبي عيننا !!
( اصوات ضحكات هههه هههه هههه )
الثور : اتركوني عليه ..
( يركض الثور باتجاه الديك ، الديك يهرب ، يلحقه الثور ..يقفز الديك إلى اعلى شجرة )
الحصان : ما شاء الله على هيك ملك جبان ، من اولها هرب و فركها ، لك ما بتخجل على حالك ترشح نفسك لهيك منصب ، إذا من التور اللي يا دوبه عبحرك حاله هربت و انهزمت متل الفارة ، شلون إذا جيتك انا و رفستك جوز على راسك عملتك يخنة !!
(الحيوانات تضحك . ههه هه ههه ههههه ..)
الخروف : على ملوخية اطيب !!
(ضحك من جديد هههه هههه هههه )
الثور : اما انا فقد شاهدتكم بانفسكم شجاعتي و إقدامي عندما لحقت بالديك لانتف ريشه ، لذلك ارشح نفسي للمنصب المقترح و تسرني موافقتكم على ترشيحي و انتخابي
الكبش : مو ناقصنا غير يحكمنا واحد تور !! لك يا أخي انتي مضروب فيك المثل بيباسة راسك و تورنتك ، بدنا واحد يكون مخه مفتح يتناسب مع العصر و الحضارة و التقدم ، مو تور
التيس : صح كلامك صح اخي الكبش ، لذلك الافضل ان ارشح انا نفسي لهذا المنصب
الحصان : يعني انتي انظم ، كمان حبيبي انتي مضروب فيك المتل بغبائك و تحجير مخك ، مو ناقصنا غير تيس يصير ملك علينا ، اصلا” ما وصلنا لهالحالة الا انتو اصحاب الدقون ، لسا بدنا نحط واحد منكم ملك علينا !! . اخي لا انتي و لا هوي ، انا افضل واخد ، انا مضروب فيني المتل بجمالي و قوتي و اصالتي ..
الدجاجة : إي إذا اناي من هلق شايف حالك علينا و ما عبتتحكى ، كيف اذا صرت ملك علينا .. و الله لتخرى علينا
الحمار : مظبوط ، كلامك مظبوط اختي الدجاجة ، هادا واحد متكبر يا لطيف ، تصوري انه بيرفض يتكدن معي بالفدان ، قال شو مستواه ما بيسمحله يتكدن جنب حمار ..
اقلكم ، احسن شغلة اترشح انا لهادا المنصب ، انا زلمة ما في متلي واحد متواضع و قوي و شجاع و ما حدا بيطلعله يحكي علي كلمة
العنزة : يا حبيبي ، ما صدقنا خلصنا من الكديش و التور و التيس حتى اجانا واحد انظم ، اجانا حمار يا فرحتنا !! زغردي يا انشراح
الحصان : اختي لا تردي عليه و تحري حالك ، إذا واحد جحش شو بدك تحكي معه ، مو ناقصنا غير ملك الرايح و الجاي يركب عليه !!
النعجة : على ها الحالة ما في حدا حصل على إجماع بيناتكم ، انا برايي ما بقي غير اترشح انا لهادا المنصب
الثور : يا هم لالي !! ما بقي غير وحدة تحطمنا ، ليش شو اختي ؟ ما عاد في زلم ؟!
الحصان : أخي التور ، الحق مو عليها ، الحق على جوزها الكبش ابو قرون سامحلها تحضر معنا الاجتماع
الكبش : ( ينظر بحدة للنعجة ) : بفرجيكي بالبيت !!
التيس : طيب و الحل يا جماعة ؟ اسم مين بدنا نعطي الانسان على اساس انه مرشحنا لمنصب ملك الغابة
الديك : ( من اعلى الشجرة ) إذا بتسمحولي انا عندي رأي
الحمار : تفضل ديك افندي
الديك : ما دام ما قدرتو تتفقوا على واحد كحل وسط من بيناتكم ، خلينا نقترح واحد من خارج حيوانات المزرعة ، بحيث نكون كلياتنا موافقين عليه
الحصان : متل مين اخي الديك ؟
الديك : مثلا” الفيل
الحمار : الفيل ، لشو خاي ، قلة حيوانات بالمزرعة لنروح ندور على واحد من حيوانات نادرة ، يعني من كل الأكثرية ما قدرنا نلاقي حدا حتى نجيب واحد من الأقليات ، مو احسن نجيب دب باندا بالمرة !! و نحني بالملايين يلعن ابونا !!
الديك : طيب و الله احترت معكم ، اذا انتو بين بعضكم ما عبتتفقو ، طيب في عندي حل تاني
النعجة : تفضل
الديك : شو رايكم ما دمنا ما اتفقنا على ملك من الحيوانات النباتية ، نقترح ملك من الحيوانات اللاحمة ، بس ما يكون مجرم و ابن حرام متل الاسد .
الحصان : فكرة ممتازة
الحمار : انا موافق
التيس : و انا كمان
بقية الحيوانات : و انا .. و انا و انا
النعجة : طيب متل مين بتقترح سيد ديك ؟
الديك : النمر مثلا” ، هادا حيوان جميل و قبضاي و زكرت
البقرة : إي صح ، بس هادا ما عنده خبرة بالقيادة و الحكم ، هادا زلمة متله متلنا ، حطني لأحطك !!
الحصان : إي و الحل ؟!
الديك : و الله إذا هيك مافي غير الاسد ، لانو من الحيوانات النباتية ما رح حدا يكسر لحدا و يقبل يسيده عليه ، و من الحيوانات النادرة ما بدكم تحكمكم أقلية ، و من الحيوانات المتوحشة بدكم يكون عنده خبرة بالقيادة و الحكم ، فما في غير الأسد
الحمار : إيوه يعني رجعنا ، مطرح ما خري شنقه ، رجعنا لنفس توبنا القديم الوسخ
الديك : ما في حل تاني
الحصان : لأ في
النعجة : تفضل سيد كديش ، نحني اصلا” كل هادا الشي اللي عملناه حتى نغير هادا المجرم ، كيف رح نقبل نرجع نكلفه ملك علينا ، انا بقترح التالي :
نحنا اتفقنا بدنا ملك متل الأسد يكون معبي العين يعني من الحيوانات المتوحشة و يكون عنده خبرة ، يعني باختصار اتفقنا بدنا اسد ، اوكي ، بس هادا الاسد لازم يكون من جماعتنا
النعجة : شلون يعني ؟
الحصان : يعني يكون اسد معليش بس لازم يكون اسد نباتي ، و من الاكثرية ، يعني حصرا” من حيوانات المزرعة
بقية الحيوانات : اوكي ، هذا هو الحل ..موافقون ..موافقون بالإجماع
(يدخل الانسان )
الانسان : سمعت صوت صياح ، و انكم وافقتو ، على مين اتفقتو بالأخير ، ممكن اعرف مين ملك الغابة الجديد المقترح
الحيوانات : اقترحنا ان يكون الملك الجديد للغابة هو اسد ، بس اسد نباتي
الانسان : اوف ؟!! اسد نباتي ؟! طيب خليكم هلق اذا” على الأسد الوحش حتى لاقيلكم شي اسد نباتي ، على مزاجكم !!

  • Social Links:

Leave a Reply