اذا لم تخجل فافعل ما شئت

اذا لم تخجل فافعل ما شئت

معين شريف بدو يغني عنا..ملحم زين بدو يغني عنا..جورج وسوف كمان بدو يغني عنا..ونجوى كرم سخصيا بدها تسهر وتسهرنا معا..عاصي الحلاني ذات نفسو..وحسام جنيد هو ذاتو مو نسخة عنو..وناصيف زيتون كان نجم عرس من اسبوعين كمان عنا…لك حتى مايا دياب بالنيو لوك ..عنا وسنحتفل بها وبجوقة الفنانين العظام. سنحتفل بالشئيئة وبفنانينها..وبسوا ربينا..ورح نرفع كاس لبنان الارز الاخضر..وشبابنا عم يترحلوا ويتقلعوا من شغلن بمطاعم لبنان..شبابنا طابين خايفين متل الفيران مذعورين بلبنان وبتركيا وبمية مكان جوا وبرا… ونحنا عم نحتفل بالاعياد الدينية وبالاعراس وعم نرفع كاسات السهرانين ويلي عم يفتوا عملة ويلي عم يدبكوا ولسا الصرامي السينيه عم تاكل من اجريهن شقف لانو متعودين عشحاطات الزنوبا..بكرا الوادي الواسع والمفرّق بيناتنا رح يصير وسع الكون..بكرا الهفا رح يبلعنا..والكراسين الميتين تعب وجوع وغربة رح يخدموا السكارى الغيارى على السياحة الوطنية وينسوا انن مو اكتر من ورق وهوا ونفس اركيلة ونفخة سيكار…
حاسة حالي ولاشي..حاسة حالي مطمورة بالخرى…اي هي الكلمة الوحيدة يلي بتمي هلق..كل سهّير بيكلف ميتين دولار بادنى حد…غير حق تيابو وقنينة الويسكي يللي ناتعا تحت باطو ومرافقتو الفرفورة يلي مشترية كندرة اعلى كعب لتحس بقيمتها العليا والمتعالية..
يمكن انا نكدة ومراية لوجه الفقر…يمكن انا شريرة وحسودة..بس القصص كتير صارت فاقعة.مقرفة. موجعة..
بس للامانة اصحاب المطاعم واماكن السهر طلعوا أكابر ومو حاطين اسعار الحجز..مراعاة للفئات الفقيرة من عامة الشعب ومنعا للصدمة..
عنجد اكابر وحساسين وولاد عز..ومحضرين حالن لكل التجاوزات المتوقعة والبدي كاردية جاهزين لفك الاشتباك مشان الفرفورات ولحسن سير سهر السكارى الميامين…
رايحة اختنق..تخيلوا انو مجرد انك تقرأ اعلان لحفلة يجيك البكي..بس البكي…حتى البزاق نشف بحلوقنا…

  • Social Links:

Leave a Reply