رؤى عبد الصمد
عضو اللجنة المركزية لحزب اليسار الديمقراطي السوري
-سكوت يا بابا. ..و الله اليوم كنت رحت فيها !!
-خير ان شاء الله ? ليش كان في برميل اليوم ?
-لا بابا لا.. في برميل و لا قذيفة و لا صاروخ , لسا الدنيا ضهر بابا و ما صار وقتهم لسا
-لكا كيف كنت رحت فيها
– اليوم دخلت مناطق النظام , رحت جبت ربطتين خبز ..
-إي ?
-و وقفني الحاجز عا المعبر يا بابا
-وقفك ? لشو ?
-ما بعرف ! , اجا واحد شكلو يا لطيف أشر علي و قللي : تعال انتي لهون ولاك .. يا أموي يا كلب !!!
-يا لطيف !! و شو انتي عملت ?
-ما خفت بابا , رديت عليه و قلت : عفوا” لا تغلط أنا لا أموي و لا كلب !!
-يا لطيف !! و شو صار بعدين ?
-قللي : لكن شو انتي ولاك ? , قلتله : أنا عباسي
-عباسي ?!!
-إي عباسي بابا , شو انتي ما بتقرا تاريخ ? العباسيين قاموا بانقلاب على الأمويين ,و الأمويين كانوا ضد الجماعة ( الشيعة ) يعني العباسيين ساعدوا الشيعة بشكل او بآخر
-اي و الله صحيح و شو صار بعدين ?
-و بلشت أنا اشرحلهم كيف انو أبو العباس السفاح دبح كل الأمويين و قطع نسل اللي حاربو الحسن و الحسين و صرت احكيلون عبطولات هارون الرشيد و المأمون و المعتصم و أبو جعفر المنصور و صرت زود من عندي بابا …
المهم الجماعة انبسطوا مني كتير و جابولي كاسة جاي .. تصور يا بابا ..قالولي انهم كانواا مفكرين هارون الرشيد سني !!
-اي سني طبعا” !!
-إي لفها بابا هلق هني شو فارقة معهم !!
-برافو عليك يا ابني خليك هيك دائما” قد حالك
-سكوت يا بابا لسا كنت بدي ألهف منهم ألف ليرة بس ما ظبطت
-ألف ليرة ? كيف ?!
-و الله يا بابا بعد ما شربت كاسة الشاي و روقت , تشكرتهم و قلتلهم : من بعد اذنكم بدي روح و إذا سمحتو ناولوني 1000 ليرة !!
-يخرب بيتك !!
-ليش بابا ?!! كلامي ما في شي
-يخرب بيتك ! كمل و شو صار بعدين ?
-و هني بابا كمان استغربوا متلك و قالولي : ليش الألف ليرة ? , قلتلهم مو نحني طلعنا صحاب , انتو كنتو بدكم تقتلوني لأنكم كنتو بتظنو انو جدي التاسع عشر كان أموي و كان يقاتل ضد جدكم التاسع عشر الشيعي !! و أنا هلق اثبتت الكم انو جدي الخامس عشر كان عباسي و كان عبقاتل الأمويين ..يعني كان عبقاتل لجانب جدكم الخامس عشر يعني شو مستخسرين فيني ألف ليرة ?!!
-اي و عطوك ?
-لا بابا ما عطوني , و قالولي شو هالحكي ?! و قاموا قلعوني و قالولي قوم انقلع و فروق طيزنا .. يلعن أبوك كلب ابن كلب … و سبوا عليك بابا !!!..
شايف يا بابا شو انهم كلاب !! بيتحدوا عا الاذى بس ، عا الخير ماوحدا بيتعرف على حدا ..!!
Social Links: