عزيمة ابو فكري !!

عزيمة ابو فكري !!

رؤى عبد الصمد

عضو اللجنة المركزية لحزب اليسار الديمقراطي السوري

-الو مرحبا استاذ رؤى كيفك شو اخبارك؟

-اهلين ابو فكري الحمد لله انتا كيفك ؟

-تمام ، زكاتك استاذ رؤى شفلي ها البوست منشان شو ؟

………

-و الله يا ابو فكري هاد فيك عليك دفعة شي ٢٠٠ يورو لأنك صارف كهربا زيادة

-العمى !! و الله ما عبنصرف شي

-و الله ما بعرف ، هاي تصفيات آخر السنة

-كيفك على هالتلجات اليوم ؟

-كويسة ، انا بحب التلج و بتذكر ايام سورية ، آه يا ابو فكري على القعدة علق جنب الصوبيا و التلج عبيندف ، و امي عاملة طنجرة يبرق .. آه هلى هديك الايام

-انتي بتحب اليبرق استاذ رؤى ؟

-يعني مو زيادة ، بس طيب خصوصا” عند بتكون الدنيا تلج

-خسا يا ابو السوم ، اليوم بتتعشى عندي يبرق ، هلق بخلي خالتك أم فكري تعملنا احلى أكلة يبرق

-الله يديمك ابو فكري ، الف شكر ، غير مرة ان شاء الله

-لا غير مرة و لا شي ، اليوم المسا ، شو هالمشكلة ، هوي بنشوفك و بنحكي شوي ، عا الساعة خمسة انا عبستناك

-الله يرضى عليك يا ابو فكري اجلها هلق ، اليوم عندي شوية شغل

-لا سيدي اليوم ، دخيلك و دخيل شغلك ، أنا بعرف من الفيسبوك للانترنيت

-طيب متل ما بدك ، ان شاء الله على الخمسة بكون عندك

……….

الساعة الخامسة و خمس دقائق انا امام بيت ابو فكري

-أهلين رؤى ..

-آسف كتير ليكون تاخرت عليك ؟!!

-لا عادي ، بس ما بعرف شو بدي قلك يا استاذ رؤى

-خير ان شاء الله ؟

-منشان العشا اليوم …و الله صارت عندنا ظروف …

(تغيرت ملامحي ، تضايقت قليلا” و لكنني قلت )

-إي عادي و لا يهمك ، خيرها بغيرها

-لا تؤاخذني استاذ رؤى الله يخليك

-و لا يهمك

-طيب اتفضل نشرب كاسة شاي

-خلص غير مرة ، بدي الحق ارجع بالباص هلق بعد عشر دقاىق طالع على الضيعة

-طيب متل ما بدك ، حقك عليي ، أنا لازم كنت اخبرك قبل ، بس و الله كنت خجلان شو بدي قلك

-عادي ابو فكري ، بس على الاقل لو كاتبلي رسالة على الواتس كنت ماجيت و لا تعذبت و لا اشتريت كرت باص و جيت بها البرد

-إذا منشان كرت الباص انا بدفعلك حقه ، شقد ستة إلا ستة و نص يورو ؟

-له يا يا ابو فكري انا مو هيك قصدي ، بس الامر عادي و الانسان بيصير عنده ظروف ، فيك كان بكل بساطة تخبرني و تاجل الموعد ..

-خيو ازرعها بدقني هالمرة ، و بنعوضلك ياها ان شاء الله بالمرات القادمة ، لسا الايام بيناتنا

-و لا يهمك ، يلله صار وقت الباص ..السلام عليكم ..

…………………….

بعد ايام …تصلني مكالمة على الواتس :

-مرحبا رؤى ، اسمع هلق بتضب حالك و تجي لعندي عا الغدا …و لا كلمة …هلق بتجي عبستناك

-يا دكتور اجلها و الله اليوم مشغول

-ما في عذر ، هلق بدك تجي

-طيب أمرك

………………..

دقائق قليلة اتصال جديد على الواتس

-مرحبا ابو سامي ، اليوم بتجي بتتغدى عندي

-و الله على راسي بس الدكتور عدنان من شوي عزمني عا الغدا

-انا ما بعرف ، طيب بتجي على العشا

-شو رايك يعني اقضي النهار كله مشاوير بين غدا و عشا !! أخي أجلها ليوم تاني

-ما رح اجلها ، اليوم على العشا بتجي احسن ما اجي و جيبك شحط

-يا الهي شو ها العلقة معكم اليوم

-بتجي

-بحاول …

………..

دقائق اتصال واتس من رقم غريب

-مرحبا رؤى انا زميلك بكورس اللغة ، انا محسن اللي قاعد اول مقعد على اليسار

-اهلين محسن

-خيو ..اليوم حابين تشرف لعندنا على الغدا

-يا محسن على راسي بس و الله اليوم ما في مجال ابدا” أجلها ليوم تاني ..بكرة بشوفك بالدورة

…………….

إي شو القصة ؟ ليكون انا ربحان مليون دولار و مالي خبر ، و لا بالغلط منزلين اسمي و مرشحيني لرئاسة شي جمهورية و نجحان بالغلط و مالي خبر ، شو قصة ها العزايم اليوم ؟!!

………………..

دقائق اتصال آخر على الواتس .. الله يستر ما تكون شي عزيمة رابعة ..لا الحمد لله هادا اخي من تركيا :

-اهلين ابو حميد كيفك كيفها أمي ، الاولاد كيفهم ؟

-مليحين بيسلمو عليك ، رؤى شو الاخبار اللي عبنسمعها عنك ؟

-اخبار ؟!!

-إي شو قصة عزيمة ابو فكري ؟

-ابو فكري ؟! آه .. ما في شي عادي ، عزمني من كم يوم و بعدين اعتذر ، يمكن صار عنده ظروف ، و انتي شو عرفك ؟

-الدنيا كلها هون مطبولة فيك ، و عا البهدلة اللي بهدلتنا ياها

-انا بهدلتكم ؟!!

-إي .. قال انتي رحت فرضت نفسك على ابو فكري و قلته بدك تاكل عنده يبرق

-انا ؟

-إي حكى مع أخوي محمد و مع سائر و قلهم انو و الله هوي مو عامل مطعم ، و قال انك إذا مشتهي على أكلة فيك تشتريها من السوق ، ألمانيا عبتعطيك مصاري ، و امي رح تجيها الجلطة من قهرها

-طيب هات احكي معها

-..قالت ما بدها تحكي معك ، و عبتقلك يا عرصى انتي إيمت  كنت تحب اليبرق ؟!!

– الله ربي هلق ابو فكري هيك حكى ؟

-إي هيك حكى ، مو عيب عليك منشان كرشك تفرض نفسك عا الزلمة ، إيمتا هيك صرت كحتوت ، الله ينعل ألمانيا اللي غيرتك ، لك لمين عبتخبي ها المصاري ؟

-لك انو مصاري ؟ امتي بتعرفني أنا بخبي مصاري ؟!

-و الله ما بعرف ، كل اللي طلعو على ألمانيا تغيرو ، بعدين شلون هيك بتطلب من الزلمة حق كرت الباص ؟!

-انا ؟

-إي انتي ، حكيتو حول كرت الباص و لا ما حكيتو ؟

-حكينا بس …

-لا تبسبس واضحة متل عين الشمس ، اصلا” لو هوي عزمك و اعتذر متل ما حكيت ما كان حكى بالعكس كان لازم يكون خجلان من موقفه ، و هاي انتي اعترفت انك جبتلو سيرة كرت الباص منشان يدفعلك ياه ، لك تفو عليك منشان كرشك و نفسك الدنية بهدلتنا بين العالم

-لك استنى هلق بدي احكي مع أبو خرا و العن امه على ابوه

-لا تحكي معه و لا يحكي معك ، اصلا” قله لمحد اخوي انه عملك حظر و لا بقا تروح لعنده عا البيت ،قله يقلك سكر المطعم ،  الحق عليك رؤى انتي قللت قيمتك منشان اكلة يبرق، لك قلة يبرق بألمانيا ، بس إش الواحد بدو يحكي معك ؟ !!!!

…………………

هادا ابو فكري لحاله قلب الرأي العام ، كيفكم بوسائل الإعلام ، الصحف و التلفزيون و القنوات الاعلامية و شبيحة الفيسبوك و المدارس و الراقصات و العاهرات و الفنانين و رجال الدين المأجورين …و غيرهم و غيرهم..

بيقدروا إلا ما بيقدروا يغيروا صورة عزيمة أبو فكري ؟!

  • Social Links:

Leave a Reply