الحريه للمعتقلين – منكوب ومنهوب – عمران كيالي 

الحرية للمعتقلين ……. (9)

(من حوارات منكوب و منهوب)

……. منكوب : عم أفكر يا منهوب أكتب قصة حياتي ..

منهوب : بلاها .. سماع مني .. الناس مو ناقصة هم و غم ..

منكوب : بس المشكلة أنو بمسك القلم ساعة .. و أنا صيفن .. ما بيطلع معي سطر واحد .. ما عم أعرف منين أبلش .. منهوب : ما عم تمسك راس الخيط ..

منكوب : لا راسو .. و لا دنبو ..

منهوب : طيب مسيك صباطو ..

منكوب : هس س س .. ما حدا يسمعك ..

منهوب : إي شو يعني كفرنا .. منكوب : أقوى .. أقوى .. إذا سمعوك بيشلحوك الصباط ..

منهوب : هلق فهمت ليش ما عم تقدر تكتب ..

منكوب : شلون يعني ؟..

منهوب : طول ما الصباط في راسك ما رح يطلع معك شي .. رح تضل صيفن إلى ما شاء الله ..

منكوب : ما لا علاقة .. بعدين هاي قصة حياتي .. شو دخل الصبابيط فيها ؟..

منهوب : يا فهيم .. براس كل واحد في شرطي صغير بارك و عم يقول : هاي بتصير و هاي ما بتصير .. هاي توديك بني غريب و هاي توديك اللومان .. و هاي توديك لمكان ما يعرفوه الجان ..

منكوب : يا لطيف شو مكبر الحكاية .. معقول !.. منهوب : معقول و نص .. دي قلي بقآآ .. وين الأستاذ رجاء الناصر ؟.. وين عبد العزيز الخير ؟.. وين غيرو و غيرو ؟..

منكوب : لك كرمال النبي وطي صوطك .. العمش .. بدك تروحنا ..

منهوب : لك سيدي .. بعد ما راحت بيوتنا و أرزاقنا ما عاد تفرق ..

منكوب : لا حول و لا قوة إلا بالله العلي العظيم .. الظاهر أنو جسدك عم يحكك ..

منهوب : إي و الله .. صاير معي تحسس من الشوب .. بس أنت شلون عرفت ؟..

منكوب : دوسايه ..

منهوب : اليوم دوري آخدك بالقرنة .