مّر الگلام – تامر قصيراوي

شو مقاييس الربح والخسارة او مين بحدد هالمقاييس؟… شو يعني تربح ارض وتخسر وطن او تربح جماعة وتخسر شعب… تربح دين وتخسر الله
تربح كلشي وتخسر حالك

كيف بدنا نحدد خساراتنا واللي خسر اكتر وهل يا ترى اللي خسر اكترحقو يحكي اكتر؟؟ … الأم اللي خسرت ولد لازم تسكت مثلا قدام الأم اللي خسرت كل ولادها
واللي ما خسر ارواح بس خسر مستقبل شو هاد ابن حرام يعني ما بحقلو يصرخ يقول هييي انا هون

بالحرب اي حرب حتى الرابح خسران بشكل من الاشكال وخاصة اذا كانت حرب عبثية مو معروف اولها من اخرها اختلطت وانقلبت فيها كل المفاهيم

كلنا خسرانين هاد الاكيد بس ما رح نقدر نربح مستقبل لان كلنا بنعتبر حالنا ضحايا وعنا مليون حدا نلومه… النظام المعارضة الارهاب الغرب الشرق الاحتباس الحراري… بينما الواقع اثبت وكل يوم عم يأثبت انه كلنا جلادين وطالما رافضين نأدرك هالحقيقة ونقبلها ونحاول نتعامل معها بكل قساوتها رح نضل بالدوامة الكارثية نفسها

على الاقل لازم نعترف بهاد الشي لحالنا ويمكن هالخطوة اصعب خطوة ع طريق الحل… قبل ما تنامو اليوم لا تشوفو اخبار ولا تحليلات لا تحزنو ع خسارة ولا تفرحو ل مكسب ولا تعصبو من عجز .. بس اطلعو بالمراية واسألو حالكم نحنا شو نحنا مين ….

تامر قصيراوي