“بودكاست” على الورق:

نجمالدينسمّان

اطمّنوا.. ما رح اطلع في بث مباشر؛ وجهي مو “فوتوجونيك” وطولي ما بيساعدني؛ وعرض أكتافي وعضلاتي.. كمان.
اطمّنوا.. ما رح صير مُحلل استراتيجي أو حتى تكتيكي؛ وصوتي ما بساعدني غنّي: تِك تِك يا ام سليمان.. تِك تِك جوزك فلتان.. تِك تِك نزل ع الحَقلِه.. متل التور الفلتان.. حَشّ الأخضر واليابس.. تِك تِك لمّا فطَس.. ورَّت ابنُه كمان.
اطمنّوا ما رح احكي بالسياسة؛ شو علاقة السياسة بالرياضة مثلاً؟.
وخاصةً إذا كان الحكم دولي؛ ومعيَّن من مجلس الأمن الكروي؛ وبيحسب أيّ نكشة.. ضربة جزاء؛ لصالح منتخب النظام.. ضد الشعب السوري.
شو علاقة المطبخ السوري بالسياسة.. شو علاقة الصحن الفاضي والمعدة الجوعانه والجيبه الجربانه وجرّة الغاز الفضيانه.. بالسياسة؟.
شو علاقة المطبخ الشامي.. بالسياسة مثلاً؟؛ وحتى المطبخ الحلبي.. مطبخين: واحد بشرق حلب قصفوه الروس؛ ومطبخ بغرب حلب واقف في طابور الغاز وناطر الكهربا ليحط الكبّة بالصينية في الفرن.
وهيك كلّ المطابخ بسوريا: المطبخ الحومصي.. مطبخين كمان؛ مطبخ معارضة تمّ اعتقالها وقتلها بساحة الساعة وتهجيرها؛ ومطبخ موالاة وصمود وممانعة محتفظ بحق الرد حتى قيام الساعه.
مطبخ السويداء.. مطبخين كمان؛ مطبخ رجال ونساء الكرامه.. بساحة الكرامة؛ ومطبخ الصرامي.. بساحة كلّ سمسار وحرامي.
المطبخ الادلبي.. صار ثلاث مطابخ: واحد بيطبخ لأردوغان؛ والتاني بيطبخ للجولاني؛ والتالت في المخيمات مو ملاقي بجيبه حق الطبخة.
اطمنوا.. ما رح كون ناقد درامي وخاصةً في رمضان؛ الدراما كمان مالها علاقة بالسياسة؛ إلى درجة.. اتفق فيها تلفزيون آل الوحش مع وزارة كهرباء الجحش مع تلفزيون سوريا في بيزنطه.. أنّو يجيبوا الكهربا.. بس وقت عرض “كسر عضم” ليكسروا عضام المشاهدين الأكارم.
أو.. ليشوفوا عضام بنات بديعة المريعه؛ أو.. ليقولوا لأحفاد حسن الصباح في السلمية ومصياف: الكبتاغون تبعنا.. أقوى من حشيش قلعة آل موت؛ وليشوهوا سيرة الآغا خان.. الواقف على الحياد؛ في المباراة بين الأسديين وبين العباد؛ وليقولوا لشباب السلمية: لا تكتبوا متل محمد الماغوط.
اطمّنوا كتير.. وخاصةً الرماديين؛ وجماعة “نازل ع الشام” وجماعة “حفظ خط الرجعه” وجماعة “حكيني ع الخاص” وجماعة “اعتلاف المعارضة” وجماعة اللا جماعة؛ وجماعة “شو مصلحتي خيّو/ شو مصلحتي أخي؛ وجماعة دكاكين المساعدات.. الخ.
أصلاً.. كلّ شي رَح يحكيه أيّ واحد.. شو إلو علاقة بالسياسة؛ بيكفي تدحشوا السياسة بأنوفنا.. ونعطس بعدها حتى ونحنا نايمين.
الشعر كمان.. ماله علاقة بالسياسة؛ حتى لو كان عدد الشعراء في سوريا اكتر من عدد الشعراء في الهند والصين.. مجتمعين. والرواية.. كمان مالها علاقة؛ أصلاً هِيِّه موضة؛ وما ضل حدا ما جربها؛ متل موضة كتابة المسلسلات في التسعينات؛ بعد موضة “ق.ق.ج” القصة القصيرة جداً؛ اللّي بتشبه موضة “م.م.د” المدفعية المضادة للدروع في الحرب العالمية التانية؛ ومتل موضة “م.م.د” المدفعية المضادة للطيارات اللّي شفناها على شاشة الجزيرة عم تلمع في سماء كابول؛ وما أسقطت حتى طيارة استطلاع.
شو علاقة قناة الجزيرة بالسياسة.. أصلاً كلّ ما كانت عم تبث لحالها من كابول أو من بغداد أو من غزة.. بتكون النتائح لمصلحة قناة العربية.
كمان قناة العربية.. مالها علاقة بالسياسة؛ هِيّي بَس.. بتحبّ التطبيق والتطبيع؛ وأن تعرف أكثر.. عن الشرق أوسط الجديد.
شو كمان ماله علاقة بالسياسة؟.
ما تقولوا: الغناء والطرب.. بزعَل منكن؛ شو علاقة فايا يونان برقصة زوربا في بلاد الإغريق؟. قصدي: شو علاقة البلبولة.. بالإبريق؟؛ شو علاقة القارورة.. بالإنبيق؟؛ ما قصدي علاقة قارورة الغاز.. بالخرطوم الزنديق.
كلّ شي حكيته.. ماله علاقة بالسياسة؛ بس ما بعرف ليش “الشعب المُتجانس” ما بيطيق هيك حكي؛ والشعب المُتناجس.. كمان؛ والشعب العنيد؛ وشعب العبيد؛ والشعب الصنديد؛ والشعب المصلحجي؛ والشعب الرعديد؛ والشعب اللّي بيعشق الماضي التليد؛ والشعب اللّي بيكره طاغيته.. بس بيحب طاغية غيره؛ لأنّو طاغيته مو من نفس مذهبه أو طائفته؛ بس طاغية غيره.. من عضام الرقبه.
والشعب اللّي قلّه الشيخ العرعور: هُبّوا؛ فصار يدق ع الطناجر؛ ولمّا انتهى دور العرعور في الدق حول مناسف الثرود؛ فتح في الرياض شركة لاستيراد الصواني من الصين.
وهيك.. الدق ع الطبل كمان؛ ماله علاقة بالسياسة؛ ولا الدبكة في احتفالات الحركة التحريفية المجيدة؛ ولا تعفيش بيوت السوريين؛ ولا زراعة الإيرانيين في بيوت السوريين.
ما بعرف.. ليش بتدحشوا السياسة حتى بصندوسشة الفلافل مع 500 ليرة وحَبِّة كبتاغون.. ارضاءً لدهاقنة قطر والبنتاغون؟!.
شو علاقة برهان غليون.. بالسياسة؟؛ أو علاقة الشيخ معاذ الله.. بشمس الديالكتيك التي تشرق من موسكو؛ أو علاقة شيخ عشيرة الائتلاف أحمد الجربا بثقافة الثقافة؟.
حتى الروحة على أستانا وسوتشي.. كانت سياحة مو سياسه؛ أسالوا أحمد بلا طعمه عن فنون المسَّاج في سوتشي بعد نومة النيرفانا على أرض المطار؛ وعن جلسات اليوغا في أستانا؟.
هيئة التفاوض كانت عم تعمل “عُمرَه” في الرياض.. شو علاقة العُمره بالسياسة وبرَجِم أبو البيش؟.
رياض حجاب لسَّاه بالدوحه.. عم يتفرّج على معرض إكسبوا 2023.
شو علاقة السياسة بالحيوانات.. لحتى ينتقلوا السوريين من عرين الأسد إلى حضن الجاموس؟!
شو علاقة السياسة بالفلوس؛ وبدكاكين الشاورما في عينتاب؛ وبدكاكين الميديا.. يا حبّاب؟!.
شو علاقة السياسة بهادا المتل السوري الأبدي: كِلّ مين تجوّز أمي بيصير عمّي.
مين عمامكم يا ترى: خامنائي.. ولّا أردوغان؛ بوتين.. ولّا ترامب؛
السيسي.. ولّا قيس سعيّد؛ ابن الناقص ولّا ابن المنشار؟!.
استحوا على حالكم.. احمدوا نظام آل الوحش لأنه ما حشر صورة القائد الأبدي بصدر كلّ تواليت؛ حتى ما ينصاب الشعب بالكتم؛ كتم المشاعر.. شي مو ديموخراطي؛ وكتم الأنفاس.. كمان؛ والكتم من سجلات النفوس.
الشي الديموخراطي اللي عملو بثار.. طبع الفلوس إم الألف والألفين.. منشان ما تستأجروا حمّالين لمّا تقبضوا رواتبكم؛ صورة الرئيث لحالها.. أتقل من صخرة سيزيف.
سيزيف نفسه.. ما كان سياسي؛ لمَّا لعَن أباطرة وآلهة الإغريق.. أسالوا طائر البطريق.. بيدلكم على الطريق.
شو علاقة البطريق.. بخارطة الطريق.. وبالمرحلة الانتقالية؛ وبالمجلس العسكري الانتقائي بقيادة مناف مرتديلا طلاس؟.
اللهم اشهد.. بأنّو عبدك الفقير اللّي حكى كلّ هالحكي ماله علاقة بالسياسة؛ السياسة.. آخر اهتماماته؛ ومستعد يعلن انشقاقه عنها على شاشة تلفزيون سوريا اللي عمل حاله تلفزيون بديل بعدين صار تلفزيون كلّ السوريين: معارضين ومشبحين؛ بعد تشريقة خالد عبود إلى أوستراليا أرض الأورينت الأولى.. وآخر قارة بتخطر ببال الشعب الشريد.
وهذه هي.. هويتي.