شو بتشربو ؟!

رؤى عبد الصمد

ابو عوض :اول شي انا برحب فيكم يا رفاق و بتشكر استجابتكم لدعوتي بالحضور لها الجلسة ببيتي حتى نناقش القضايا الوطنية و القومية الملحة ، و نطلع برأيي موحد للحزب من كافة المستجدات و الاحداث السياسية الراهنة ..
و انا طبعا” عملت مسودة و حابب اطلعكم عليها و تعطوني رايكم فيها و اذا حدا عنده اعتراض او ملاحظة يا ريت يفيدنا فيها ..
اولا” موقفنا من الهجمة الامبريالية الصهيونية على جمهورية اوغندة اكيد انتو معي بأننا نرفض ها الهجمة و نقف بصلابة بوجه ها المخططات الاستعمارية و نعمل بشكل دؤوب حتى نفشلها و يستعيد الشعب الاوغندي قراره الوطني المستقل ، لذلك ارجوكم لازم ننفذ حملة اعتصامات و تظاهرات ضد السياسة الامريكية بالمنطقة و نحشد كل الجهود لتقديم الدعم اللوجستي و المالي و العسكري لجبهة تحرير اوغندة و نوعز لجناحنا العسكري بتنفيذ عمليات ضد المصالح الامريكية في المنطقة و في العالم عموما” ..
حتى عنده اعتراض على ها النقطة ؟

• رفيق ابو عوض ، انا برايي حتى ما نبعثر طاقاتنا و قوتنا في القارة الاقريقية يا ريت نركز على القضايا الملحة في منطقة الشرق الاوسط ، و بعدين نتفرغ للقضايا في القارات الاخرى
• قصدك يا رفيق غسان نتخاذل عن واجباتنا القومية و الوطنية و نستسلم للضغوطات الامبريالية ، انا ما توقعت انك تكون هيك يا رفيق غسان جبان و اناني و انبطاحي و بتفرط ببساطة بمبادئ حزبنا و باهدافه ، يا عيب الشوم عليك
• عفوا” رفيق ابو عوض انا ما قصدي
• بيكفي رفيق غسان، انتي معنا إلا معهم ؟ قولها بصراحة انتي معنا و لا مع الامبريالية و الصهيونية العالمية؟
• لا معكم اكيد
• إذا” خلص انتهينا من ها النقطة ، خلينا ننتقل للنقطة اللي بعدها و موقفنا من اتفاقية المناخ الاخيرة ، انا طبعا” بعتقد انكم بتايدوني ..عفوا” انا نسيت اسالكم شو بتشربوا بالاول ؟
• متل ما بدك رفيق ابو عوض ، بس بالنسبة الي شاي إذا ممكن
• و انا كمان شاي
• انا بفضل القهوة
• طيب خلينا نعمل تصويت ، اللي بدهم قهوة يرفعوا ايدهم ، معناها الاكثرية بدهم شاي ، شاي اذا ممكن رفيق ابو عوض
• طيب تكرموا يا رفاق ، وينك يا ام عوض اعمليلنا ابريق شاي عن زكاتك
  ام عوض : ليش ما حضرتك بتقوم تعملها لحالك ، و لا بدك تساوي حالك رجال قدام الضيوف تبعك ..
• وطي صوتك لا تفضحينا ، طيب قليله لواحد من الولاد يعملنا الشاي ..
• قلهم انتي ، شو لسانك آكله القط

– بتعرفي انا ما بردوا علي ، قليلهم الله يرضى عليكي انا مو فاضي عبنناقش الخطط للتصدي للاميريالية العالمية ، و منشان الجلي لا تاكلي هم انا بجلي الكاسات بعدين و بمسح المطبخ بس و الله هلق مشغول ، حاملة الطائرات الامريكية صارت قريبة من قناة السويس و لازم نمنعها من متابعة سيرها ..دخيلك يا ام عوض قليله لشي ولد يعملنا شاي بلا ما تخجلوني قدام رفقاتي ..!!