تستاهل شو ماصار فيك

رؤى عبد الصمد

• بتستاهل شو ما صار فيك و اكتر يا بابا
• ليش شو الجريمة اللي ارتكبتها بحقك و حق غيرك حتى تحكي معي هاد الحكي ؟
• طبعا” بتستاهل ، لو ما كنت تستاهل ما كنت اشتغلت ببلاش كل ها الفترة ، و آخر شي حطو رجلهم بضهرك و قالولك انقلع عن ( … نا )
• احترم الفاظك ولاك ، انا ما حدا حط رجله بضهري و انا رضيان بوضعي انتي شو دخلك !!
• كيف شو دخلني !! لك اللي ما بيفهم الطيخ من البطيخ صار و تصور و انتي بعدك .. متل دودة الارض بتشتغل بتشتغل و بياخدو خيراتك و بمجرد ما شافوك ظهرت طخ بيهرسوا راسك ..
  لك بابا كل شغلك و كتاباتك و قصصك و مسرحياتك و شعرك و افكارك شو اجاك منها ، و اللي سرقها منك صار كاتب و اديب و سياسي و أخد جوائز ادبية و دروع تذكارية و دكتواره فخرية و انتي بعدك يا حسرتي كلمة محلل سياسي ما حدا اطلق عليك ، كلمة خبير استراتيجي لشؤون الشرق الاوسط ما حدا قلك ، لك حتى و لا مجموعة فيسبوك منحتك دكتوراه فخرية ، لك ما حدا قدمك على انك دكتور محاضر بحامعة فيلادلفيا الامريكية ، و لا قالوا عنك حاصل على الجنسيتين الامريكية و الفرنسية ..لك حتى ما حدا قال عنك كاتب معارض و لك حتى مؤيد ما حدا قال عنك ، ما حدا قال انك باحث و الك دراسات و منشور الك باشهر المجلات العالمية …
  كل هاد و انتي رضيان و قنعان و شايف حالك بعشر اعجابات بتجي على منشوراتك و قال شو الكل بحبك و بحترم رايك و بمجرد ما تفتح تمك برايي مخالف الهم ببيبعتولك واحد أزعر بيمسح فيك الارض ، بقى قلي بتستاهل اللي صار فيك و لا مو بتستاهل ؟! لك قلي بشو هدول اللي صاروا و تصوروا بالكذب و الدجل و النفاق و السرقة و العمالة بشو احسن منك ؟
• بولا شي ..
• لكن ليش ما بتصير متلهم ؟
• لانهم مو احسن مني بشي ابني .. ما انتي قلتها لحالك ..!!
  ..