سلوى زكزك
يوم الجمعة بيكون سوق الخضرة بكشكول مليان بالعالم..لانه عطلة والزلم بترافق الزوجات ليساعدوهن بحمل الغراض. يعني انه في تسوق لكميات كبيرة .
مبارح اغلب الناس اشتروا ملفوف..في اجماع بديهي انو بلا لحمة..
بس القصة بالرز يلي وصلت اسعاره لأرقام فلكية..
في ست اشترت نص كيلو جوانح مشان تنكه طبخة الملفوف الكبيرة ..وفي ناس عم يطبخوا المعكرونة بمرتديلا المساعدات اذا طلعلن كم علبة.النهفة انو في ست ختيارة جاية من الساعة8 الصبح وبدها تشتري طبخة محاشي بسعر لقطة..والبياعين يقلولها لسا السوق بأوله..نقت ٧ بيتنجانات و٣ كوسايات وكيلو بندورة وتقول للبياع انا اشتريت كتير من عندك كارمني…
ولما وصلت لسعر راس التوم الصغير بالفين ليرة نقزت وقالت عمرينو التوم بيعمل نفخة…
حركة بيع الزيتون بالحد الادنى..وبيتنجان المكدوس دبلان ومرتكي ع جنب والرغببة قلال..
في جوز اسود مكسر ما فيك تشم ريحته عم ينباع بحجة انو رخيص .
حتى قنينة الزيت النباتي صارت ب٢٧ الف ليرة والناس عم تشتري زيت فرط عم يقولوا انو زيت نخيل وطبعا سمعته سيئة كتير..
والناس عم تشتري رولات ورق التواليت نخب رابع للاستعمال بدل محارم اليدين وبيفتفت وبيلزق ع الوجه والايدين..
هنن وراجعين قلها زلمة لمرتو..فيقتيني مشان هالكم كيس الصغار..قالتلو والله القصة بدها تكبير للجيبة قبل الكياس.
يوميات دمشق
Social Links: