سلوى زكزك
رحنا عالبسطات يلي بكشكول..
برادي.فساتين وتياب. فناجين مكسرة.صحون..ملاعق. قالت بسمة بس لو تلاقي ست صحون أكل متل بعضهن. صحي فقر وشحار بس مو قدرانة تتحمل كل صحن شكل .في شي معروض عالارض مالك نفس تشيله..بس بيجي حدا وبيسال عنه. بلكي بعطوه ياه ببلاش بلكي بياخدو بسعر محمول. صبية شافت لهاية وبيبرونة وعضاضة بدها تاخدن..انا خفت..لهاية وبيبرونة..ليش مين هون ؟ولطفل صغير..قالتلي بغليهن بخل..خفت اكتر طلعت متعودة تشتري شغلات لابنها من هون..
ست اشترت 4 ملاعق شاي صغار..عم تربي حفيديها وقال الكبيرة عصبية بتضل تكب الملاعق الصغيرة مع الزبالة..
في ست فاصلت البياع ع البرادي..كل وحدة قياس وكل وحدة لون..قالتلي الصغيرة تسميكة من القفا مشان الضو والبرد والغبرة.قاستهن بالشبر..قربتن وبعدتن عن الضو..شافت من وين بدها تشبكهن ببعض..اشترتهن وهي عم توعد البياع تعوضه بشروة تانية لانو خلصوا مصرياتها..مافي كياس .حطت هالبرادي ع كتفها ومشيت. متل يلي شاحط كفن..
سقط المتاع بسقط الأماكن..والناس عم تتدافش لتشتري الممكن..حتى المكسر والغريب عن بعضه والمشقوق والمشحر والمقشر الناس مامعها حقه..
كلنا ماشيين وكأننا عم نجر كفن .ياالله ما أتقلك ياكفن..يالله ما أوحشك يابلد..
يوميات دمشق
Social Links: