سلوى زكزك

في عرباية بالة بالبرامكة جنب سوق الخضرة..سيدة عم تدور على مانطو..
عجزت ومالقت بدها موديل ولون محددين ومو مموضين. والبالة مو من عنا ، يعني مابتفهم عذوقنا..
المهم قلتلها تعي نروح ع سوق الحرامية..نقزت. بس رضيت بالأخير ورحنا ولقينا..وللامانة رخاص وحلف البياع انو في ست عطتو ياهن تشحيدة يعني مو سرقة، قاست واشترت مانطو سميك وكحلي متل مابدها..ولقت السيدة واحد تاني عسلي وسميك بس بلا زرار..والبياع طلب سعر كتير قليل..قلتلها بس مالو زرار..ردت وقالتلي احسن ، اصلا انا بدي البسو روب للبيت..وعندي زنار عريض نفس اللون..
انتبهت اني مستغربة السيرة..قالتلي طول عمري البس رواب صوف مهفهفة ومطرزة بالبيت..وهلق بدي اغسل هاد مليح وشك القبة شوية خرز عتيق سحبتن من كنزة تختخت خيطانا وبيصير احلى روب..
ضحكت ،بس نخزة قلبي ارتسمت عالضحكة..قالتلي شدي حيلك وخليني افرح ..الي ٩ سنين وانا بحلم بروب مشكوك خرز اتفتل فيه بالبيت..
السوريات البهيات..انفاسكن عطر وحكاياتكن خرز ملون..

سلوى_زكزك