سلوى_زكزك

الباص الاخضر مليان وحضرتو قاعد وتارك المقعد الجواني فاضي..لما طلبت يبعدلي حتى اقعد قام وضل واقف..طلع ما بيقعد حبنب نسوان مشان الحلال والحرام!! بس بيروّح المقعد عالنسوان الواقفة وهلكانة والباص المكبوس والهفتان عم ياخدها ويجيبها..
بسرفيس مزة جبل..طلع شب عالبركة..صار يقلو للشوفير بحياة امك كارمني بالأجرة..بحياة والدينك لا تاخود مني مصاري..الشوفير ختيار ومعصب..فتح الباب وقلو يا بتنزل يا باخدك عالشرطة ،نزل الشب هو وعم يبكي وينبش بجيابو و يفرجينا انن فاضيين ويقلو والله مامعي..
عند مشفى الهلال اب حامل بنتو وراكض فيها..والبنوتة قمرة بس تعبانة كتير..وهي تقلو نزلني انا بمشي لا تتعب حالك وهو يقلها لا تحكي ياروحي بتتعبي..
عند السفارة السعودية ولد مضيع الفين ليرة..ماعرفنا حقيقة او تمثيلية للشحادة..بس في ست قالت والله الضياعة صعبة والالفين كتار..رد عليها الولد من نص البكي وقلها مليح ما نزلوا الخمس تلاف شقفة وحدة..ضحكنا كلنا الا الصبي ضل مشغول بالدوارة ودموعو سكب على وجهو..
عند درج الغساني ٢ عشاق عم يشربوا الكولا الرخيصة بقناني البلاستيك.هي عم تقلو بكرا مافيني اطلع من البيت وهو عم يقلها بدك تطلعي مشاني…بكرا بقبض جمعيتي وعازمك ع شاورما..
اليوم فقط وخلال جولتي الشامية نزلت بسبع حفر تلاتة منن قد سدر النابلسية..اكيد شفتن بس مافي طريق تاني والله..
هنا دمشق