يوميات دمشق

سلوى زكزك

من حوالي المية سنة كان في ام بضيعة نائية جدا تقول لأولادها كلوا خبز حاف واخر لقمة غمسوها بالزيت والزعتر كانكن اكلتو الرغيف كلو بالزيت والزعتر..

مبارح في ام فنانة..مبارح مو من مية سنة..عاملة خلطة سحرية  زيت زيتون حقيقي وزعتر حقيقي بعلبة بتتسكر وبتنفتح بس بإيد الام.

.هي الإيد بتلف رغيف كامل زعتر قليل ومي..بس اول لقمة وآخر لقمة نكهة تانية..الام بتقسم لقمتين خبز من الرغيف وبتغطهن بالخلطة السحرية وها اللقمتين هنن البداية وهنن النهاية..وهنن القصة كلها..وبس تسال الولد شو عم تاكل بيقلك زيت وزعتر..ويمكن يناولك اول لقمة أو آخر لقمة!

وأنت مو بس بتصدقو..بتقول هي اطيب سندويشة زيت وزعتر. اكلتها بحياتي..

مبارح المول يلي فلس وعم يسكر بوابو زاد عندو كيس زعتر نص كيلو..عطاه لست..فتحت الكيس واخدت نفَس وقالت للشب روح انشالله بتكمش التراب بيقلب دهب..وسفت سف…