البحث عن القمل ..

الخال أبو رفعت – كفرنبل

وقت كنت صغير قبل ماأقعد في المدرسة كان شعري طويل وكنت كل النهار ألعب مع أولاد الحارة بين الوسخ -والطراب وأرجع عالبيت حالتي حالة من الوسخ تقوم أمي الله يرحمها ويرحم أمواتكن تمسكني وتحطني في حضنها وتفلي راسي شعرة شعرة يطلع معها كل مرة أربع خمس قملات من راسي وكل ماتلاقي قملة تسلخني فالشحاط على تمي وتنتف نص شعري وهي عبدور على قمل وأنا دموعي يهرني وبعدين تاخدني على الحمام تغسلني دورين تلاتي شامبو وصابون غار أطلع عبلمع لمع .
سوريا كان فيها شوية وسخ وطلع هالشعب ثورة لينضفها قام العالم بدل مايساعدنا على تنضيفها ماخلا وسخة بالدنيا إلا جابها على سوريا وبحجة تنضيف الوسخ عبيلزقونا على تمنا لزق ونتفوا راسنا نتف .

ليش العالم عايش بنضافة وأناقة ورايدنا على طول انضل عايشين بين الوسخ