عمران كيالي
….. منكوب : من يومين يا منهوب شفت أبو وردان …
منهوب : مين أبو وردان ؟…
منكوب : أبو وردان، الكاتب الذي ينشر حواراتنا …
منهوب : ولك هادا مو كاتب، هادا كرار و بياع حكي …
منكوب : ما علينا، قال أنو حواراتنا بايخة و ما عم تعجب حدا و ما فيها أكشن …
منهوب : شو يعني أكشن ؟…
منكوب : يعني حركة، دراما سريعة …
منهوب : شو يعني دراما؟… منكوب : ولوووو، بعدين معك، كل شغلة بحكيلك ياها، بدك معناها، شلون بدنا نرفع مستوى حواراتنا إذا أنت رح تضل غشيم ؟…
منهوب : أصلا رفع سوية الحوارات شغلة أبو وردان مو شغلتنا، نحنا دراويش على باب الله …
منكوب : إي، صح، شغلتو، بس مو لازم نحنا نساعدو ؟…
منهوب : و ليش حتى نساعدو ؟ لهلق ما طلعلنا منو و لا فرنك …
منكوب : من إيمتا أنت بتركض ورا المصاري ؟ بعرفك جومرت و جخيخ …
منهوب : يا سيدي هلق، بعد ما الأمبيرات هدت حيلنا، و الغلا فضا جيبنا و خلانا ع الحديدة، صار بدي أقرشا، إما بيدفعلنا حتى نرفع سوية الحوارات، أو نبطل ها الشغلة …
منكوب : ما شاء الله عليك، خرج نحطك في هيئة التفاوض مع أسعد الزعبي …
منهوب : لأ، دخيلك، بعدني عن السياسيين كرمال النبي، ما إجانا منهم إلا وجع الراس، بهدلونا الله يصطفل فيون …
منكوب : طول بالك، يعني معقول ما في سياسيين كويسين ؟…
منهوب : بجوز في كويسين، بس مغلوب على أمرهم …
منكوب : الخلاصة، أنت موافق أنو نرفع السوية ؟…
منهوب : موافق، يا الله شيل معي .
Social Links: