الراتب ودفن الميت ــ الخال أبو رفعت – كفرنبل

بزماني كنت موظف وقبضان راتبي 8000 ليرة وشوية فراطة وأنا جاي على كفرنبل وماني حاسد الملك على عيشتو وعند ما وصلت الدوار جنب الجامع الكبير اتاري في صلاة على جنازة ميت قبل المغرب بشوي قلت ياولد روح صلي وشارك بالدفن بلكي بصرلك شوية حسنات والله صلينا على الجنازة ورحنا عالمقبرة ندفن الميت ومن كتر ماني طماع بالحسنات شاركت بتنزيل الميت على القبر وكان الوقت صار ليل والله بعد ماخلصنا ورجعنا ورجعت أنا عالبيت قالتلي أم رفعت وين كنت لهلق حكيتلها القصة وأنا عبشلح تيابي ضربت ايدي على المصاري إلي كنت حاططهن فجيب القميص مالقيت ولا فرنك وهويتي كمان معهن ضايعة صرت اضرب أخماسي فأسداسي قمت قلت أكيد وقعني من جيبي وأنا عبدفن الميت المهم خرب بيتي لان عندي أقساط وجمعيات وفواتير واللذي منو قلت لأم رفعت مابتروحي معي عالمقبرة لحتى ندور على المصاري وكان صار الوقت بعد العشا قالتلي والله اذا بطلقني مابروح وبين أخذ ورد بيني وبين حالي أخدت هالفاس والكريك ورحت بهالليل على المقبرة ماوصلت القبر الا طار نص عقلي وأنا بالأساس ماعندي نص عقل وكل ماأحفر شوي أسمع صوت أترك هالعدة وصير الركد مضيت هالليلة فزع قمت قلت ياولد ارجاع والله بعوضك تاني يوم فقت الصبح لقيت الهوية عند باب الدار ومامعها ولا فرنك . هلق الشعب السوري صحيح خسر كل شي وخسر نص عقلو بس ياترا في أمل بيوم من الأيام يفيق شي مرة ويلاقي عالقليلة حدا مرجعلو هويتو