مر الكلام – تامر قصيراوي

بالعاميه
مر الكلام
تامر قصيراوي

مدري نحنا السوريين عنا مشاكل زيادة عن البشر مدري نحنا السوريين نقاقين ومنعمل من الحبة قبة..

بس يا خيو مين في شعب بالعالم عنده صراع يومي مع الحياة بهالبشاعة متل السوريين..

كل يوم عنا علقة مع الحرب ويا منعيش يا ما منعيش

كل يوم عنا صراع مع المستقبل يا بيجي يا ما بيجي

كل يوم عنا صراع مع الغلا والسرقة والبطالة والوضع المعيشي يلي بيخنق

كل يوم منسأل حالنا اذا حبيب او قريب او اخ لالنا رح يرجع ولا لأ أو رح يموت أو لأ

والسوريين يلي برا عندهم كمان قصصهم

كل يوم صراع مع أي مجتمع فيه لتثبت انك مو ارهابي وجاية تقتلهم

كل يوم عندك صراع هوية..مين نحنا وكيف مناكل وكيف منحكي وكيف منتصرف..بتحس انك لازم تفسر وتبرر اي شي بيعمله اي سوري بالبلد يلي انت فيه..انت متهم ولازم تدافع عن حالك كل يوم..كل يوم

كل يوم عندك صراع مع الماضي ورفقاتك واهلك يلي تركتهم بالبلد وما تركوك برا البلد

كل يوم عندك صراع هوية واوراق واثباتات..انت مضطر تثبت للسوريين جوا انك سوري متلهم..وللمو سوريين برا انك بني ادم طبيعي متلهم..

والله ما عم نعمل من الحبة قبة..بس خيو التعبان صوته بالعادة أعلى من صوت المرتاح..

تمن سنين حرب وهجرة ونزوح وغربة وموت وقتل وغلا وارهاب والله بيقدرو يخلقو التعب ويخلونا كل يوم عايشين على حافة الانهيار..ويلي عالحفة دايما النسمة بتسببله ذعر..

بيقلك المتل..الضربة يلي ما بتقتلك بتقويك..بس المتل ما قلنا الضربات يلي النا سبع سنين عم ناكلها كل يوم وما قتلتنا..بتقوينا يا ترا ولا بتتركنا بشر ما عندهن القدرة عالاحساس..اسألولنا أهل أول زكاتكم..خلونا نتنور

بيبقالنا من كل هالعجقة شوية ذكريات حلوة ما قدرت الحرب تقتلها..بيبقالنا كمان لحظات حلوة عم نخطفها من هالحاضر خطف..وبيبقالنا أمل بانو هالتعب رح يجيب بالمستقبل نتيجة…..