نسينا نحرر الجولان

رؤى عبد الصمد

– له يا بابا على ها النسوة !!
– خير إن شاء الله شو نسيت ؟
– اليوم الصبح كنت مقرر احرر الجولان ، و راح عن بالي ، هلق لتذكرته
– الجولان ؟ ! و انتي شو دخلك بالجولان ؟!
– كيف شو دخلني ما نحنا سوريين و الجولان ارض سورية !
– ما اختلفنا ، بس شو المناسبة هلق يخطر على بالك ، ما صار الها محتلة خمسين سنة ما حدا فكر يحررها
– لانهم خاينين طبعا” ، بس انا اخدت على نفسي عهد إلا احررها
– سيدي وقت بتقدر لا تقصر ، بس هلق انتبه لدروسك
– بقدر ليش ما بقدر ، و اعتبارا” من اليوم رح ابدا المعركة
– من اليوم ؟! طول بالك ، خليها لبكرة ، او لتخلص فحص على الاقل
– إي نعم من اليوم ، شو فحص شو بطيخ ، امام تحرير الارض و صيانة العرض
– لك يا ابني انتي شو بدك بها الصرعة ، عيف الجولان و اهله قاعدين بامان الله و حمايته
– هلق انتي بتسمي العدو الصهيوني امان الله و حمايته ؟!
– ما قصدي استغفر الله ، بس اللي حبيت اقوله تركهم مرتاحين اقل شي عندهم كهربا ما بتنقطع اربعا و عشرين ساعة
– ليش الشي بالكهربا بابا ؟!
– مو بس كهربا ، عندهم كمان اكل و شرب و عمل و غيره و سواته
– ليش الحياة بس اكل و شرب بابا ؟!
– يا ابني صحيح مو بس اكل و شرب بس لا تنسى كمان لا عندهم قصف و لا فساد و لا خراب و لا موت ، اتركهم بحالهم يرضى عليك ، اشتكولك هني شي و طلبوا منك تحريرهم ؟!
– ليش ضروري يشتكولي حتى احس بواجبي الوطني و القومي بتحريرهم ؟!
– لا إله إلا الله على ها اليوم ، عيفني تعبان بدي نام
– نام مين مانعك ؟! اصلا” انا مستغرب منك كيف جاييك النوم و الجولان يئن و يرزح تحت الاحتلال الصهيوني
– اخي حرر على كيفك تصطفل ، بس طفي الضو انا بدي نام
– و كيف هيك انا بدي احرر الجولان عا العتمة ؟!
– طيب طول بالك لبكرة عا الضو
– لأ ، ما بنام الليلة حتى حرر الجولان
– طيب حرر متل ما بدك ، بس دير بالك لتجيك طلقة من الخلف
– شو انك جبان يا بابا ، جيلك اصلا” كله جبان ، بتخافوا من الجندي الاسرائيلي و مصدقين اسطورة الجيش الذي لا يقهر
– انا قلتلك دير بالك لتجيك طلقة من الخلف مو من الجيش الاسرائيلي
– لا تاكل هم ، انتي روح فسي نوم ، و تروك هيك مهمات للناس اللي بستاهلوها و اللي قدها ، لابطال الامة العربية ، ابطال التحرير و التصحيح ..
– طيب تصبح على خير
– احلام سعيدة بابا ، اقرا المعوذتين حتى ما يجيك شي جندي اسرائيلي بالمنام ..و تعملها- لا تآخذني- تحتك
– ما رح رد عليك .انتي ولد مشفتر
………
– شو شايفك ما طولت ؟ و شايفك عبتلبس بيجمتك ، خير ؟ مو على اساس بدك تحرر الجولان ؟!
– نعست بابا ، اجلت الموضوع لبكرة
– إيه ، نيالهم اهل الجولان ، رح يكملو نومتهم اليوم بهنا
– مين قللك ؟! ما انا اخترقت الحدود و وصلت لحدود حيفا ، فعن انو جولان عبتحكي ؟!
– حيفا ؟!
– إي حيفا ، إذا ما بتصدق ، قوم غسل عينيك و تعال شوف الاخبار
– اخبار ؟!
– إي بابا ، تعال ، على الكمبيوتر ، اقرأ الاخبار العاجلة
شوف 🙁 سامي يكسر الحدود الاسرائيلية و يصل حتى حدود مدينة حيفا ، قتل 36 جندي اسرائيلي ، اسقاط ثلاث طائرات F16 و دبابتين ميركافا ،
المجموع 56 نقطة !!
– بس هاي لعبة ؟!
– إي لعبة لكان شو ؟ هاي لعبة جديدة نازلة اسمها تحرير فلسطين
– و انا يا كلب كنت خايف عليك و مفكرك صحيح بدك تحرر الجولان ، تاريك عبتلعب لعبة يا كلب ، تع لهون ولاك بدي العن الساعة اللي شفتك فيها
– بابا شبك ، انا شو عملت ، هاي انتو صار الكم خمسين سنة عبتلعبو فينا ، مرة بدكم تحرروا الجولان و مرة بدكم تحرروا القدس !! انا لعبت ساعة فضحتني ؟!!