من صفحاتهم (بعض تفاصيل ماجرى على جبهة ريف اللاذقية في ٢٠١٩/٧/٩)

انا عسكري بالفرقة الثانية لواء ١٤٤ كتيبة ٧٠٩ كنت بآخر هجوم صار علينا، صار عنا هون جريمة وخيانة ورح احكي عن كل شي صار، وعن أحداث كتيرة.

خيي نقطتنا يلي جابهت هالولاد الحرام وقت الي هجمو وضلينا مقاومين ل12 ساعة متواصلة نحنا بقطاع عطيرة جنب نقطة الهجانة يلي تسللو عليا واجانا منها الرمي وع اساس انها صديقة.
المهم بكل الموضوع انو نحنا وبفضل العناصر الأبطال ومنهن بطل اسمو (ح .ص) يلي الو الفضل الكبير بصد الهجوم، وهوي هلا متصاوب بالراس وبالمشفى موجود، قدرنا نقاوم ونصمد.

بس يلي صار ونحنا ما حاسين ع حالنا بعد 3 ساعات من الاشتباكات من الأمام والجانب اليمين، أنو اليسار صديق بيطلع معادي ووقتا اتصاوب (ح .ص)، النقطة الصديقة كانت معادية من أول المعركة،ونحنا مامنعرف، والسبب بهالشي قائد النقطة (فراس محمود ) يلي بوقت الهجوم كان هربان لآخر النقطة ومعو الجهاز ونحنا ماعم نعرف شي.
ضلينا نقاوم الهجوم ل3 ساعات ونحنا ما منعرف يسارنا معادي الا لأ.
اتخيل ضل الهجوم 12 ساعة عالمحاور كلا واتخيل نحنا من 9 الصبح ل الساعة 1 الضهر لعرفنا يسارنا معادي.

نحنا اذا صمدنا ف بفضل المصاب البطل (ح.ص) والملازم يوشع وافراد نقطة من البسطاء، واللي كان المجد الن والتكريم تاني يوم ويلي كان قائد الكتيبة (بشار تجور) بشكل دايم يفضلن عن الباقيين من حيث النزلات والتكريمات هدول الي كان منسحبين ع اخر النقطة، وكانو ناطرين سير المعركة لايهربو.

ومن ميزات قائد النقطة الفنيص والمحبوب من قائد الكتيبة انو بسببو فر 5 عناصر بعد ابتزازهم بالمال والطلبات والهدايا قبل الهجوم بفترة وجيزة، شو بدي احكيلك عنو لاحكيلك.

وبنص أحداث المعركة كان عم يقول لواحد روح خبر القدام لننسحب، وكمان بنص النقطة في عنا رشاش 14 ونص مارمى ولا طلقة ولا غطالنا بسببو ماكان يخليون يرمو كان خايف يرمو يستهدفون او يرمو علين.
يعني تركونا بالمحارس الامامي بدون دعم.

اهم شي وفوق كل شي صار فينا وبعد صمودنا ويلي كل قطاعنا بيشهد بهل شي.

خبرنا العقيد وطلعنا لعندو ماكان يستقبلنا ولا يرد علينا نحنا ما منقدر نأمن بقائد نقطة خاننا.

قبل الهجوم كان ديك علينا وكان متغطرس ومكرهنا عيشتنا وقت المعركة صار صوص بس نحنا مامنقدر نعيش معو بقى ولو شو مصار، بتمني تنزل منشور وتطالبنا بحقنا نحنا ما ألنا غير الله والسيد الرئيس،

مابعرف شو بدي اكتبلك لسى فيه مشاكل كتير عنا، نحنا منطالب بلجنة من الامن العسكري أو قيادة الاركان تجي ع نقاطنا وتسمع اللي صار وتاخد بحق شهدائنا ويسمعو همومنا وتشوف صعوبة عيشتنا وتعرف شو اللي صار بهل يوم البشع الي استشهد فيو اكثر من ١٠ شهداء و ٧ جرحى بسبب هل خيانة العظمى.

إلى قيادة الأركان والأمن العسكري والمسؤولين عن الأمر
فتح تحقيق سريع بهذه الجريمة ومحاسبة الفاعلين .