سردة مواطن

رضوان آل رشي

أنا مالي محلل سياسي،  ولا انتقد أحد، أنا مجرد إنسان غير الله مالوا حبيب ولا سند. هي مجموعة حروف، هي سردة مواطن سوري

أنا كما قلت ما بفهم بالاقتصاد ولا بالسياسة ولا بفهم  باليورو ولا بالدولار، وأنا بجيبتي كتير أيام  ما بتلاقي 500 ليرة، وعندي عيلة صغيرة عايشين تحت سقف نحمد الله عليه. ولادي متل ولادكم عايشين على الأحلام، خلقوا بزمن كلوا ظلام، وشافوا بعيونهم الحرب والقتل والاسى، شافوا الانهيار والدمار وحتى القله والغلا عاشوها وعم يعيشوها، وملعون أبو اليورو ليلحقوا الدولار من سنين ونحنا عم نسدد ونقارب وكل ما منقول قربنا نصل لحل بتزيد المسافة مئات الأمتار بنزل بدي اشتري إلهن ثياب بطلع على واجهة المحلات ومبسترجي أتجاوز للمحل الاعتاب أسعار متل الخيال لأنه حرب وطالعين من حرب قال وكمان نتيجة الحصار  وبعدين بعد مليون محاوله يمكن يلبسوا ولادي تياب جديدة.

وبالطعام نتذكر شيء اسمه اللحم والطبخة اللي بينحطلها نصف كيلو، والآن حتى الوقيه صار لازم نحسب لها مليون حساب وصارت اللحمة بالطعام متل التيمم للصلاة والطهارة يا أحباب، والسلع كلها التاجر بلع الدنيا كلها.. والحمد لله.

الدروس مابيقطعها عند النابلسي والملا والشعال، وتدرج بأمثالهم لتصل للاعتاب…أين الله وأين إنسانية الجميع وهل تنقضي الأمور بدعاء منمق ونشيد ديني، يا أصحاب والرب الحال بيبكي والصبر بماء الدموع ذاب بتنزل على السوق بتلاقي الأسعار جهنم واللي ما معو يجيب، شو بدو يعمل وكل الكلام، كذب وسراب؟ لا رقابه ولا ضبط وإن صار.. بدفعة خلف الستار، انمحى الضبط وذاب

وكل يوم الصبح بحمل جرة الغاز على كتفي وبوقف على دور الذل والعذاب كم واحد ماتو بجلطة من بسبب العراك، لأنه بينا وبين التنظيم والإدارة غربه واغتراب، وهاد بياخد اللي مو اله وبعدين بيوعظ وبينظر متل تيتو وبينجاب والمسا برجع والحمد لله كاني عامل عمره وحجه بعز الشوب ياشباب لك بس بدي نام بيكتر حولي الكلام على طلبات الاساتذه والانسات اعمال واشغال ووظائف من منهاج مالوا اساس ومنين عم نجيب قال من عالم العولمه والحداثه والاتمته سيدي

انه لازم الطالب يشغل عقله والعلم بطريقة الاستنتاج..لك ليش اولادنا شو شافوا وشو درسوا وشو النمط اللي فهموه ببلدهم من الحياة

ليستنتجوا العلوم ويفهموا انه الرغيف اسمه ايضا كماج، نحن جماعة ما عنا جوازات سفر، ما عنا ارصدة بالبنوك، وفرش البيت ما غيرتو من عمر ابني الكبير.

نحن ناس على قد الحال نسينا ونسيوا ولادنا المشوار وين بدن نغير  جو المطعم محرم علينا لانه الايعار يلا لا لا لا لي بتعمل باالعقل ارتجاج ، نحن عالم ما النا وزن وحتى الرقم على باب البيت انمحى لانو انمحينا من الهم والوجع الي بقلبنا.

نحن جماعة وقت تصير مشكلة، ما عندنا حدا يتوسط النا والكل بيحكي بالقانون فوق راسنا.

نحن الي من سنين الكل بيحكي باسمنا، ويقبض باسمنا، والشعارات باسمنا، الثورات باسمنا.

واسمنا انمحى حتى من دفتر العيلة

تغربنا ببلدنا وتنشططنا ببلدنا وتبهدلنا ببلدنا

وهالبلد يا ابن عمي شو طلع فيه…..ناس بلا اخلاق وبعد الحرب كله بان اكتر واكتر.

والتجارشو فعلا ولاد حرام و ما يخافو الله

انا  سوري وفي مني كتير الله وكيلك

شايلين هالبلد على كتافنا وبقلوبنا

انا مو بس ياسيدي شايل قنينة غاز على كتفي انا شايل همي وهم الناس وهم الوطن حاطوا على راسي تاج

انا شايل  بقلبي بلدي والتاريخ  والناس والزمان وحامل هم ابني وبنتي كمان والله من كتر الهم  نسيت اسمي وتهت عن العنوان..