عمران كيالي
اليوم الأول :
-أسعد … يا أسعد …
-أيوا سيدي … أنا هون …
-تعا لعندي شوي …
(ينهض أسعد و يتوجه إلى غرفة رئيس الدائرة )
أسعد : رجل في الخمسين من عمره، غزا الشيب ما بقي من شعره، منذ عشرين عاما يعمل هنا في دائرة التشغيل، يحب الترتيب، يهتم بهندامه، منتظم و دقيق في عمله و دوامه …
يردد في سره، قبل أن يدخل : خيرا إن شاء الله، اللهم اجعله خيرا …
-شو صار بطلبات التوظيف يا أسعد ؟
-موجودة سيدي …
-طيب، بعد أن تفرز طلبات النساء عن طلبات الرجال، افرز لي أصحاب الشهادات العلمية، يعني الهندسة و الكيميا و هيك شي، و أحضرهم لي …
رئيس الدائرة : رجل في الخامسة و الأربعين من عمره، دعمه المباشر من رئيس المخابرات العامة، كان ضابطا في المشاة، قبل تسريحه لأسباب صحية . تم تعيينه هنا خلفا للحقوقي سمير الذي انشق منذ ستة أعوام و سافر إلى بلجيكا …
-شو بدو منك ؟ (يسأل أبو أحمد)
-ما في شي … بدو أفرز الطلبات …
-أيوااااا …
أبو أحمد : أقدم موظف في الدائرة، سيحال إلى التقاعد هذا العام، تم تعيينه بالدرجة الخامسة على النظام القديم بصفة كاتب منشيء، و يعمل حاليا بصفة رئيس الديوان …
اليوم الثاني :
-يا أسعد … شو صار معك ؟
-يا الله سيدي … جاي لعندك …
(يدخل أسعد إلى غرفة رئيس الدائرة)
-هات لأشوف …
-سيدي، طلع معي …
(يخرج ورقة صغيرة من جيبه و يقرأ)
822 إضبارة نساء
109 إضبارة رجال
16 إضبارة فقط للهندسة و الشهادات العلمية …
-تمام … عطيني ال16 إضبارة و روح على شغلك …
الوظيفة المطلوبة هي خبير محكم في دائرة الأمن الصناعي، و تتطلب هذه الوظيفة شخصا ملما بالأمور الميكانيكية و هندسة الإنتاج و أنظمة المعامل و الورشات و أشياء أخرى …
اليوم التاسع :
-شو صار بوظيفة خبير محكم يا أستاذ أسعد ؟ (يسأل أبو أحمد)
-و الله ما بعرف يا أبو أحمد … بدك تسأل رئيس الدائرة …
-ما بدي أسأل و لا شي … مين ما كان يكون … أصلا الشغلة ما بتهمني …
ما قبل اليوم الأول :
-ألوو …
-نعم سيدي …
-عبد السميع نجح بالمسابقة اللي رح تصير عندك بالدائرة …
-إي سيدي … بس عبد السميع ما لو طلب توظيف و إضبارة عندي …
-رح تصلك إضبارته بالبريد السريع، و طلبو رح يجيك بالفاكس بعد شوي …
-طيب …
-متل ما قلت لك … عبد السميع ابن أخت صاحبنا … دير بالك عليه …
-أنت تأمر يا معلم … متل ما بدك رح يصير … خليه يداوم إيمتا ما بدو …
(و لسا بتسألو كيف البلد خربت)
حلب 14-1-2020
Social Links: