المؤامرة الوحيدة كانت على الشعب السوري – بسام يوسف

كتب بسام يوسف ……………بعد تصريح نتنياهو عن علاقة الغرام بينه وبين “رأس حربة المقاومة والممانعة” بشار الأسد، صار من المعيب على اليسار “المخاطي العبودي اللزج “( كما يسميه صديقي نبيل ملحم) وعلى كل من يؤيد عصابة النظام، ان يبرر مواقفه بالمقولة الشهيرة ( استهداف النظام بسبب مشروعه المقاوم)، يعني اللي فيه شوية دم لازم يستحي من معزوفة المقاومة.
طيب هي خلصنا منها، منجي على مقولة انو النظام السوري نظام علماني وانو انتو وقفتو معو في وجه الجبهة الفاشية المتطرفة ..
طيب ياخيي تعو نقرا السبع سنوات اللي راحت على كل الصعد … داعش اللي ضليتو تزعقوا، وتنطوا، منشانها انو الثورة بدها تجيب هدول اللي بياكلوا الاكباد النيئة وبيسبوا النسوان و..و… ياخي شو صار بداعش ..؟؟ ومين طلعت داعش..؟؟ ومين قاتلت داعش ..؟؟ ووينهن قادة داعش …. شوفو لأي فرع مخابرات تابعين منشان تستحوا على دمكن شوي، ولا قادة النصرة اللي احتفل النظام بعودتهن الى مراكز عملهن بعد انجاز مهمتهم …. ؟؟؟ واللي جاي من الأيام رح يقلكن مين هوي الجولاني، ولا البغدادي، ولا كل هدول السفلة، هلا مارح احكي عن القبيسيات وعن المناهج.
منجي على انو هي مؤامرة كونية على الرئيس العظيم …. طيب ياخيي مين الجهات اللي تآمرت عليه ..؟؟ تفضلوا نورونا … !!.
أمريكا، ولا اسرائيل، ولا السعودية، ولا قطر، ولا تركيا، ولا … مين ؟؟!!.
اسرائيل عم تتغنى به وبقدرته على ضبط حدودها على مدي اربعين عاما، وما بتستغنى عنو، وامريكا كل ما صار وضع عسكري مناسب شوي للمعارضة بتوقفها وبتمنعها تتقدم، والسعودية اللي تدخلت مرات عديدة لانقاذ النظام واهمها لما فكرت امريكا انو تضرب ضربة شكلية – بعد كيماوي الغوطة – لوقف الضربة واللي لهلا عم تدعموا بالمصاري، ولا تركيا اللي سلمتو حلب، واللي ماخلت قطعة سلاح مو متفق عليها تفوت ، واللي واللي …. ولا قطر اللي ما خطت خطوة واحدة بدون موافقة امريكية اسرائيلية ..ولا ..ولا ..ولا أمريكا اللي منعت ملف سيزار حول المعتقلين من ان يتحول الى محكمة العدل الدولية ومنعت جهات كثيرة من تداوله؟؟.
منجي على حماية مؤسسات الدولة …. بشرفكن ما شي بيضحك وبيبكي انو لساتكن ماسكين بهالمسخرة اللي اسمها مؤسسات الدولة ..؟؟ عن أي مؤسسات عم تحكوا ..؟؟ ليش في بسوريا دولة أولا ..؟؟ وهي البنية القائمة اللي كل مافيها منظم لصالح العصابة الحاكمة ولتسهيل نهبها لثروات البلد ولحماية السفلة اللصوص هي دولة أو مؤسسات دولة ؟؟.
تفضلوا شوفولنا مؤسسات الدولة تبعكن تعطينا رأيها بال 500 اسم يوميا اللي عم يسلم النظام هوياتهم وتقرير وفاتهن كل يوم لأهلهن … خلي أخو أختو يسترجي يطالب بفتح تحقيق حول مقتل عشرات آلاف السوريين بالسجون !!!.
استحوا على دمكن … واذا فيكن بقية من شرف اسكتوا …
المؤامرة الوحيدة اللي شارك فيها الجميع كانت على الشعب السوري وعلى حلمه بان يعيش بالحد الادنى من الكرامة والحقوق، أما انتو …..
تفووووووووو.