……….فراتي…… -شعر – د. تركي ردويش سلامة

ابني شهيد

……….فراتي……
الى روح شهداء ثورة الحرية والكرامة

 هذا ابني بزنّر بدمّه شهيد
 ياما ربّيتك حبيبي
 وانتضرتك
 تكبر وتنصر ابوك
 كُبْرَت وياي المصايب
 كبّرتني
 مثل عنقود العنب
 لوشاخ
 باخر ايامه زبيب
 هيّه مرّة الواعديتك تبقى جنبي
 تحفظ اسرار المحبة
 وتحمي اسوار الوطن
 تكتبلّي
 عن حزن باوجوه ربعك
 ترسم احوال المدينه
 وكل حجايا بلمّة الغيّاب طيب
 امشي يابني
 لاتِحَسْب العين تجرح
 ولا تجيس الليل
 باهداب الزمن
 موشرط سود الليالي
 والقمر يضحك سعيد
 ولا تعود مزهّب بصولات ربعك
 بل أريدك صولة من نبض الفرات
 انتخيك بلحظة تنخاني أبوك
 خذ صدى الايام مني
 وامشي لاغر ّك مشيب
 يابني بالهوسات اسري
 باول اليمشون اسري
 احرس بيوت الحوتّك
 من توالي الريح
 واقفاص العبيد

 مادريت العتمة تفضح
 كل رصاصه تكتب اسمك
 تمتحني
 ضاجت الدنيا بضواها
 والضواري الناحت بفي الوريد
 من هَويت بجنبي
 شفت الليل يهوى
 النجوم اتوسّدت عين المنايا
 والجرف حضّر عباته
 معطره بدم الشهيد
 صرّخت والدنيا تسمع
 هذا ابني وهذا للناموس راية
 هذا اية
 من وهج تموز
 من صُلبي هدايه
 قوم يابني
 ماهكيت الدنيا تفرح
 وماهكيت دموعي للشريان صايه
 ولا دريت
 ادروبي صارت للوطن
 محزّمة بدم من يوافي
 وبالوفى يوافي اليزيد،

 ومادريت ايامي رادت تمتحنّي
 وما دريت
 بدمك المنثور واحه
 للفرح ميدانه ساحه
 وفدوة لايام المحنّه
 صاغه للتحرس شرفها
 مزينه بشط المدينة
 معمده بماي الفرات
 يابني ضميت الحزن باتراب جدك
 سيّجت كل السواجي
 والجروف الما سعتنا
 والشواطي عمدتها
 بجرحك النازف حياة ناحت الخلجان حضها
 محمله بدمع البواچي
 وكالزبد مرسومه صاح
 كلشي زاهي
 دم يسيل
 ودم على الثاير ثقيل
 قوم يابني
 اتحدّى مكسور المواجع
 هذا دمك لليحب الناس غايه
 كالسنابل ودعت كوم البيادر
خمرّت مشكاها دمعه
 وعمرت ملقاها عيد
قوم ياكبدي الفديته
 من سمارك ضمديت اجروحي
 و بلحدك هديته
 ومانسيت بلحظة رسمك
 مكحّل بدمك عنيد

 د. تركي درويش
 ……………سلامة …………