منهوب : و الله يا منكوب،الحالة تعبانة كتير، يعني بدك ثلاثة من الشبيحة الكويسين على الأقل، و شي طبيبين بمشافي الحكومة، و شخص ميسور الحال و قلبو لله، و ضابط أمن ذو رتبة، حتى تقدر تعيش بهالبلد …
منكوب : هات لأشوف، فسر لي هالحكي …
منهوب : الشبيح الأول منشان يأمن لك إسطوانة الغاز و كام ليتر مازوت، و يكون الواسطة بينك و بين المختار …
منكوب : هاي فهمناها، و الشبيح التاني ؟…
منهوب : التاني منشان إذا إلك معاملة في دائرة رسمية، يريحك من طلاع و نزيل، روح و تعا، خود وهات …
منكوب : طيب، و التالت ؟…
منهوب : التالت يكون واسطتك مع صاحب الأمبيرات، و بيقدر يأمن إلك كام ليتر ماء منشان الشرب و الحمام …
منكوب : طيب، هلق ليش بدك طبيبين ؟…
منهوب : يا رجل كل شي صار غالي، و أسعار المواد الطبية بالنار، و الأدوية كمان، يعني إذا أنا مرضت أو مرتي مرضت أو حدا من ولادي مرض، لو رشح بسيط، رح تنكسر الميزانية و نتبهدل …
منكوب : أكيد رح تقللي الشخص الميسور منشان تتدين منو مصاري حتى تكمل الشهر، لأنو راتبك يا دوب يكفي عشرة أيام …
منهوب : صحيح … و الضابط منشان يخلصني إذا علقت بشي حاجز، و حجزوا هويتي بحجة أو بدون حجة …
منكوب : كلامك صحيح يا منهوب،كتير وارد إنك تلاقي طبيب إنساني، و كتير وارد إنك تلاقي ميسور قلبه لله، و كتير وارد إنك تلاقي ضابط أمن يخلصك من علقات الحواجز، و محتمل تلاقي شبيح كويس يخدمك … بس ثلاثة يا منهوب ؟ و الله صعبة كتير !!! و إذا بدك مشاكلك تنحل دفعت واحدة روح صير شبيح …
منهوب : ( تشفيييييييير – لزق الحكي بالحلق )
Social Links: