شكثر احبك “فراتي” – د.تركي درويش (سلامة)

 

 

ضليت أتبعك

  روحي ناحت

 تِعبتْ تْدور عليك

وانتَ بين اضْلوعي نايم

 بكل خطايا الضّيم

أحلم واشتهيك

إنت مني بذيچ توهات القلب

ضيعتني جروفي ترفه

وغرّگتني احْزان من تنزف أجيك

ودوّريت النّبضة من هاي الكتف

تنسى ذيچ الروح

وتضمني بديك

لاهگيتك تحبس

 الونّه بحزنها

وتحسب الجيّات

 وظروف الرسايل

حِتْ مكاتيب الهوى

طيرتها الريح والكاتب غريب

ما عرفتك تشتري الباعوك

وتبيع اليحبك

وهاي روحي

 تمَرْمرَتْ من جوابات الكذب

وجرّبت كل الدروب التمشي بيها

مالقيت إلاّ دَرْبون الوفى

يقودني لذاك الدرب

شيّلتني الدنيا همّي

وضيعتني سنين مكسور الخواطر

وآنا ناطر تحسب الونّات مني

ترميني عالبيبان كلمة

وانت حاير

تنسى ذيچ العَبْرَهْ

من هانت عليك

مادريتك تشتريني

حزام من ذيچ الستاير

تلهى فيني

تبيعني بتيه وسراب

وانا أركض بالهوى

 يالساكن دموعي بنبعها

تصير للعاشق ضوى

إنتَ نجمي وذاك ليلي

وكل خبايا الروح

حلمانه بْصفى

لا جفن عطشان

من دمعي إرتوى

ولا خدرت الكلمات

ولا لمْها مُجيب

مادريت

الروح ذبلت واسْتوَت

من كثرةْ النّوبات قَلّبها السّنا

بكل وجعها سنين

ما تقبل تطيب

 ومادريت

 إني الملاذ لروحك

بذاك العبير

ونبضةالمشتاق

لِ قليبك  لهيب

لامَسيت اهْداب قلبي

وسوّرت كل المنايا

وابْتغيتك

جالحلم توهبني إسمك

وارسمك قدّاس قلبي

تبتعد عني  أتبعك

وآنا نبراس العلالي

لو غرّبت دنياك عني

أبقى لانفاسك قريب

لك حرام

يضيع  عمري وناطريتك

يا عزى الروح العليلة

ويانسيب الدنيا صبرك

ما هو آنا الْيِنغَلب

والروح

مجروحه بمحنتك

آنا غربلت الخلايا وحده وحده

عانگيت الدنيا فيك

إنت صبري وكل جنوني

قدّمت إلّك، كل الوصايا

واخْتمتْ قاموس كذبك

وهذا آنا أرسل إلْروحك سلام

بلچي أقدر تحتويني

وأحتويك

ونصير مثل العاشقه ومجنون

محبوبه وحبيب

…سلامه..