ماحسينا بصعوبة العطش
لأنه من 7سنين عطشانين
ماحسينا بالجوع
لأنه من 7 سنين محرومينلك ماحسينا بالصيام … لأنه الصيام بعلم الصبر
ونحنا من 7 سنين صايمين عن الحياة الطبيعية
لك من 7 سنين ونحنا متل رمضان
عم نعلم العالم كله الصبر
حلاوة رمضان ب لمة العيلة
واللمة ضايعة والعيلة مشتتة
كلما منطبخ طبخة منقول
هي بحبها فلان …. الله يجمعنا فيه
وهي الأكلة كان يحبها علان … الله يرحمو
هو بيتمنى يتزوج اللي بحبها
وهي بتتمنى تنجح وتتخرج
وهداك بيتمنى يرجع ع بيتو
وهديك بتتمنى تشتغل وتحقق حلمها
واحلام كثيرة …. واماني كبيرة …
بس الكل بهالشهرعم يدعي دعوة وحدة بس
/ يارب فرجها على هالبلد /
لأنه إذا خلصت الحرب
العشاق بيتزوجو …. والأهل بيجتمعو
والنازحين بيرجعو … والطموحين بينجحو
والمكتئبين بترجعلن البسمة
تخيلو ….
كل أمانينا بتتحقق باستجابة دعوة وحدة
تخيلو ….
نتنازل عن كل أحلامنا مشان حلم واحد
تخيلو …
شعب بأكمله عنده حلم واحد ودعوة وحدة
مندعيها وقت الإفطار … ووقت ختمة القرآن
ووقت الفجر …. لك بكل لحظة وبكل ثانيةرمضان عم يضب حقيبة سفره
وبيبكي ع حالنا وبيقول
/ أنا طالع لعند الله …. وبدي احكيلو كل شي
وبوعدكن رمضان الجاي ….
اجمعكن مع كل المغتربين
و منفطر سوا بقلعة حلب …. /
الله كريم …. رمضان كريم …. وصبرنا بيستاهل … وبيبقى الأمل
Social Links: