حوار مع صديقتي المؤيدة !!
رؤي عبد الصمد
-يا رؤى اناي ليش معارض للنظام ؟! مو شايف المتطرفين شو عملو بالبلد ؟
-شايف ..بس خليني اسألك سؤال بالاول ، لو بشار الاسد من اول شهر للمظاهرات تنازل عن السلطة و عمل انتخابات حرة نزيهة كان صار كل هادا الشي ؟
-يي .!! كان صار اكتر .. انتي وين عايش !!
ليش برايك مين كان رح ينجح بالانتخابات !! و الله ما كان رح ينجح غير الارهابيين ..
-طيب لو حتى .. و على فرض نجحوا الارهابيين ، مو كان على الاقل احسن من هادا الوضع ؟
-لك كيف احسن ، شو انتي ما بتسمع اخبار ؟ كان صار اسوا من هيك بألف مرة
-ليش شو كان ممكن يصير ؟!
-اولا” شغلة هدول الارهابيين كانوا رح ينهبوا البلد ..البترول كله رح يتحول مباشرة لحساب رئيس الارهابيين بسويسرا ، و الفوسفات كمان ..الضرايب و مردود الجمارك لا تحكي فيهم بنوب هدول رح يكونوا من حصة الدناب تبعه ، يعني المسؤولين اللي رح يحطهم لتنقيذ سياساته و نهبه و سلبه ، و ضباك الجيش ووالمخابرات اللي عن طريقهم رح يحكم الشعب بالبوط و بالذل و بالقهر .. و لا تنسى انو هدول المسؤولين و الضباط رح يختارهم من اسوا الناس و وفق اعتبارات طائفية و عرقية كمان ..
-اوه كل ها الشي كان رئيس الارهابيين رح يعمل ؟
-و اكتر كمان
-بس بها الحالة بيقوم الشعب ضده ، بيطلع مظاهرات متل ما صار بتونس و مصر و بيسقطوه
-مظاهرات !! انتي لساتك بيبي بالسياسة !! لك شو مظاهرات رح يضربهم بالرصاص و بالدبابات و بالطيارات كمان ، و رح يشكل مرتزقة و شبيحة من الطلاب و العاطلين عن العمل و الدناب تبعه ليقمعو ها المظاهرات
-بس بها الحالة الشعب ما بيسكت و رح يرفع السلاح يدافع عن نفسه
-و شو رح يطلع بإيد الشعب دخلك !! ما كل السلاح و الجيش و المصاري رح يكونو تحت ايده ، شو بدو يعمل الشعب امام الطيارة و الصاروخ و الدبابة !!
-صاروخ و طيارة و دبابة ؟ شو انتي وين رايحة ، المجتمع الدولي ما بيسمحله ، صرنا نحنا بعصر الفضائيات و الانترنيت و كل شي بصير صار يوصل لكل الدنيا
-مجتمع دولي ؟! ههه ..ضحكتني و الله ، و المجتمع الدولي شو هامه دخلك ، اصلا” بالمصاري اللي رح يسرقها من الشعب رح يستخدمها ليشتري ضمائر كل قادة دول العالم و وسائل الإعلام ..و رجال الدين و الثقافة و الفن ..
-إي لا ما بيعملها الا حدا يوقف مع الشعب ضد ها الارهابي و ما يسمحله يستخدم القوة المفرطة ضد شعبه ، لا تقليلي انه كمان رح يستخدم الغازات السامة ليبيد شعبه !
-بالله شو ؟!! غازات سامة ؟! يا سيدي غازات سامة و صواريخ سكود و يمكن يخترع اسلحة جديدة هيك متل حاويات او براميل مليانة متفجرات و يرميها على الشعب
-مستحيل العالم يسكت اذا متل ما عبتقولي ، اصلا” لشو يتمسك العالم بهيك رئيس ارهابي اذا بدو يعمل كل هادا الشي ؟!
-حبيبي مو قلتلك رح يشتري ضماير العالم بمصرياته ، هادا اذا كان بقيات اصلا” ضماير عند هدول الناس ..بعدين لا تروح بعيد ممكن يستخدم ورقة اسرائيل كمان
-و شو خص اسرائيل بالموضوع ؟
-ما خصها بس قلت يعني ، مممن يستخدمها و يوعدها و يوعد العالم كله انه يحمي حدودها و يتنازل عن الجولان الها حتى يلقوه مستلم الحكم و دايس على رقاب الشعب ..
-مو معقول كلامك مو معقول ، شو ما كان شكل الرئيس اللي رح يجي ما ممكن يعمل هيك شي ..
-لا سيدي ممكن يعمل اكتر من هيك
-اكتر من هيك متل شو ؟
-ممكن اذا ما قدر بجيشه و المرتزقة تبعه على الشعب مممن يستغين بقوات اجنبية و قوات مرتزقة من الخارج
-إي و بعدين ؟
و لا قبلين ، و هيك بيصير البلد شوربة ، قتل و دمار و فقر و هراب و جرائم و قوات أجنبية و هاد مع هاد ووهاد ضد هاد ، و ممكن يعمل بعدين خساسيات بين الطوائف و بين الاعراق و المناطق و تصير حرب شاملة و ناس تهرب و تطلع من البلد ، تغامر بالبحار و تموت غرق ، تصل على اوربا و تنذل ، تضيع اموالها و خبرتها و اسرتها ..و آخر شي ما بيبقى إلا يتقسم البلد و يصير كل شقفة و نتفة بلد لحاله ، وةيصير بدك فيزا و موافقة امنية اذا بدك تطلع لحارة تانية ، فخلينا على بشار الله يرضى عليك بيكون احسن ..
-إي و الله إذا هيك خلينا على بشار ..احسن ما يجينا شي رئيس إرهابي ..بس عفوا” انتي عن انو رئيس عبتحكي ؟
-آ ؟! آ ؟! انا انا ؟! انا عبحكي عن …يا ربي شو هالغلطة ..ضروري انا احكي كل شي عمله السيد الرئيس !!
Social Links: