رؤى عبد الصمد – الرافد :
نتنياهو : اهلين ابو سامي تفضل ..و الله زارتنا البركة تفضل استريح ..
رؤى: مو انتي نتنياهو ..انا شو وصلني لعندك ؟
نتنياهو : المهم وصلت سيد رؤى ، الله عليم انا منتظر ها الزيارة من زمان
رؤى: كأني انا عملت حادث و نقلوني عا المشفى و انا حاليا” فقت من العملية
نتنياهو : لا حادث و لا عملية و لا مشفى ، الموضوع ببساطة حبينا تشرفنا بزيارة ،هاي القصة و هي امها و هي ابوها
رؤى: ما انا عارف الموساد تبعكم ،هي عملية دبرتوها لتعتقلوني
نتنياهو : مين جاب سيرة الاعتقال يا سيد رؤى
رؤى: لكن لشو جبتوني ؟
نتنياهو : جبناك بالاول حتى نكسب ها الطلة الحلوة و تانيا” و هو الاهم حتى نضع خطة عمل مشتركة بينا و بينك
رؤى : تشرفنا و الله ، من وين لوين اخي في بيناتنا خطة عمل مشتركة ما طول عمرنا اعداء و حرب على بعضنا
نتنياهو : صحيح نحنا كنا اعداء كل ها الفترة بس حلنا نتصالح بقا و نعيش احباب مع بعضنا
رؤى: و شو المناسبة دخلك ؟ شو يعني عنزتكم جابت جدي و بها المناسبة السعيدة حبيتوا نتصالح ؟
نتنياهو: يا سيد رؤى ارجوك تتفهمنا ، نحنا بنحبك و بنحترمك و حابين نسكر على قصة ها العداوة و نعيش متلنا متل باقي أمم الله
رؤى: يعني بفهم من حكيك هاي جلسة مفاوضات ؟
نتنياهو : انتا عيني ، سميها متل ما بدك جلسة مفاوضات
رؤى: طيب بصفتي شو انا بدي أفاوض ؟ فهمنا انتي رئيس وزراء العدو بس انا مين و شو وزني حتى اتفاوض معك و باسم مين ؟!
نتنياهو : ارجوك سيد رؤى عبد الصمد ما في داعي لكل ها التواضع ، انتي اكبر من هيك بكتير و اسمك غني عن التعريف
رؤى: و الله ما عبفهم عليك
نتنياهو : يا سيد رؤى عبد الصمد انتي و باعتبار الشعب السوري اختارك بالاكثرية ممثل اله و منحك تفويض كامل للتحدث باسمه و عقد كافة الاتفاقيات الدولية بالنيابة عنه فنحنا من هادا المنطلق جبناك حتى نتفاهم معك و نتفق على صيغة العلاقات المستقبلية بينا و بين بلدك سورية ..
رؤى: الشعب السوري اختارني ..بالاكثرية ..تفويض ..اتفاقيات ،وحدة وحدة دخيلك و الله دار راسي ما عبفهم عليك ، ايمت الشعب السوري اختارني و فوضني و منحني و ما بعرف شو ؟!
نتنياهو : انتا رؤى كنت نايم و نحنا عملنا تصويت فانتي فزت بالاكثرية و حققت نتيجة ٩٩،٩٩% و تجاوزت كل المنافسين الاخرين و اللي كان عددهم مية الف مرشح
رؤى : اوف ..طيب فرجوني نتيجة التصويت ؟
نتنياهو : يا سيد رؤى انتي بدك العنب الا بدك تقاتل الناطور ؟! عبنقلك الشعب السوري اختارك ، خلصنا من هة القصة بقا و خلينا نبلش شغل
رؤى : شو الشغل
نتنياهو : يهوه ربي ، شو صار الي ساعة عبحكي ، عبنغني بالطاحون ، العمى شو انو عقلك سميك
رؤى : طول بالك و الله انا دايخ ، طيب وصيلي على فنجان قهوة عن زكاتك بلكي بصحصح ..
نتنياهو : وسط متل العادة ؟
رؤى: كمان بتعرف كيف قهوتي؟!
نتنياهو : و بنعرف كل شي عنك ، خود هي فنجان القهوة تزهرم
رؤى : اوف منين طالعت فنجان القهوة ،كيف هيك ؟
نتنياهو : اخي تكنولوجيا متطورة ، كمان هي بدك تعملي ياها قصة ،لك بوج مين انا متصبح اليوم !! العمى على ها العلقة
رؤى : ما رح اعملك قصة و لا مسرحية ، كل الموضوع انا طلبت فنجان القهوة مو منشان القهوة ،انما منشان تجبلي ياه سكرتيرك هيك نغير شكل شوي ، عليم الله وجهك بيقطع الرزق
نتنياهو : هلق هيك طلع معك سيد رؤى انا وجهي بيقطع الرزق ، الله يسامحك
رؤى: الحق ما بزعل يا سيد نتنياهو ، طيب ليش ما بتجي تسيبي ليفني تتفاوض معي هديك بتفهم علي و بفهم عليها ، انتي وجهك مو وجه تفاوض
نتنياهو : يا عيني يا روحي تسيبي ليفني تركت الحكومة و انا رئيس وزراء اسرائيل حاليا” و خلينا بقى نبدأ المحادثات و حاج تضيع وقت
رؤى: طيب بشو انا بقدر اخدمكم ؟
نتنياهو :استغفر يهوه العظيم ،انبرى لساني و انا اشرحلك بدنا نحل القضية و الصراع بينا و بينكم كلامي واضح و لا مو واضح ؟
رؤى : واضح بس اذا قصدك بها اللفة و الدورة تضحك علي حتى اعترف بوجودكم بتكون غلطان ، على قطع رقبتي ما بعترف بوجودكم
نتنياهو : لك شو اعتراف ما اعتراف عبقلك بدنا ننهي المشكلة من اساسها ، و لا تنسى العالم كله عبينتظر نتيجة ها اللقاء بيناتنا و اكتر زعماء العالم اتصلوا معي و اكدولي دعمهم لها المفاوضات و تعهدوا بتطبيق اي قرار بيصدر عن هذا اللقاء و لو استدعى الامر استخدام القوة
رؤى: متل مين اتصل معك ؟
نتنياهو: ترامب و بوتين و اردوغان و بشار و قادة الخليج كلهم و ميركل و ماكرون و مين بدي عدلك كمان ؟
رؤى: ليش انتي بتحكي مع بوتين مو على اساس انتو اعداء ؟
نتنياهو : عبتتذاكى سيد رؤى ؟! يعني بدك تقنعني انك مو عارف اننا حاطين الكل بجيبنا
رؤى : عارف طبعا” بس هيك حبيت اسمعها منك ، طيب يا ترى مختار ضيعتنا اتصل معك ؟
نتنياهو : لك شو ها النهار يا ربي ، اخي بدك تجري مفاوضات معنا و لا لأ ؟
رؤى: طيب مين انتو بالاول ؟
نتنياهو : لسا ما عرفت ؟! نحنا دولة اسرائيل
رؤى: خسئت مافي شي اسمه دولة اسرائيل انتو مجرد كيان اسرائيلي
نتنياهو : و شو الفرق
رؤى: بتفرق طبعا” ، بس شو ، راح عن بالي و الله ، بس اكيد في فرق
نتنياهو : طيب اوكي هل انت موافق على اجراء مفاوضات مع الكيان الاسرائيلي
رؤى : شو بيمنع !
نتنياهو : يعني موافق
رؤى: موافق يا سيدي ،و بلط البحر ، شو مفكرني خايف منك
نتنياهو : حلو ، طيب و شو هيي طلباتكم يا سيد رؤى ؟
رؤى : طلباتنا ؟! طبعا” غير فنجان القهوة اللي طلبته من شوي هوي اننا نستعيد فلسطين
نتنياهو : طيب و شو هيي حدود فلسطين برايك؟
رؤى: مبينة من النهر الى البحر
نتنياهو : مي
رؤى : شو مي ؟
نتنياهو : مو انتي عبتحزرني ؟!
رؤى : لا انا عبقلك حدود فلسطين ..
نتنياهو : ايوة !!
( يرن الهاتف ، نتنياهو يرد )
نتنياهو : اهلا سيد ترامب
..اي مجتمعين .. بس مافي تقدم بالمفاوضات حتى الآن ، قال شو .. حدود فلسطين من النهر الى البحر ..
ترامب عبر التلفون : ضربه مخمسة على وجهه بلكي بيصحى و بيعرف شو عبيحكي
( نتنياهو يقترب و يصفع رؤى)
رؤى ( يتاوه) اخ ..ليش ضربتني ؟!
نتنياهو : و الله هي اوامر السيد ترامب ، حتى تعرف شو عبتحكي
رؤى: شو بدك مني بالضبط ؟
نتنياهو : بدي ما تتجاوز حدودك ، نحنا هون لحل المشاكل بينا كاسرائيليين و بينكم كسوريين و شايفك انا عبتخلط عباس بدباس ..اشرب قهوتك و صحصح بقا
رؤى : قصد نتفاوض عن الجولان يعني ؟
نتنياهو : تمام هلق صرت تفهم علي ،شفت الكف شو جاب نتيجة ..
رؤى: طيب اوكي بنتفاوض حول الجولان
نتنياهو : انتي عيني ، فشو هيي طلباتكم يا سيد رؤى
رؤى: طلباتنا ..!! طيب قبل ما اقول طلباتنا فيني اسأل يا ترى السيد ترامب رح يرجع يتصل ؟
نتنياهو : ممكن
رؤى : لا اذا رح يتصل معناها بتنازل الكم عن ١٠% من الجولان احسن ما اكل كف تاني
( يرن الهاتف ..يرد نتنياهو)
نتنياهو : اهلا سيد بوتين ..تمام ..لا لسا ما خلص اجتماعنا ، و الله يا سيد بوتين المفاوضات شاقة ، تصور قال عبيطالب ب ٩٠% من الجولان ..شو سيدي ؟ اسفقه مقلوبة على وجهه ، حاضر
( نتنياهو يصفع رؤى)
رؤى: أه ، طيب خلينا احباب ، مناصفة بينا و بينكم نص الكم و نص النا
( يرن التلفون ،نتنياهو يرد )
نتنياهو : اهلا سيد اردوغان ..لا و الله ما في حتى الان نتيجة ،دق المي و هيي مي ، تصور قال بده نص الجولان …هههه ..شو .. و الله بعملها بكرة بطالب بنص لواء اسكندرون كمان.. من شوي ترامب و بوتين اتصلوا طلبوا مني اسفقه كم كف ..كمان انتي بتزكيه ، كف واحد و لا تنين..؟
( يصفع رؤى مرتين )
رؤى : اخي خلص ما بدنا شي من الجولان بس حلو عنا ما بدنا شي منكم ..مليح هيك ؟
( يرن التلفون من جديد ،يرد نتنياهو )
نتنياهو : اهلا” بشار افندي ..شو الاخبار ، على حطة ايدك لا عبلز و لا عبنز ..هوي اصلا” تربايتكم شو بدو يطلع منه يعني ..بدك تحكي معه طيب خود احكي معه
و لك رؤى خود احكي مع رئيسك
رؤى : ( يتناول التلفون ) دخيلك يا سيدي الحقني ..صحي انا بكرهك بس بتم واحد من شعبك و حياتك يا سيدي لا تتركني بها المحنة .. و بوعدك وعد شرف ما عدت جيب سيرتك بالعاطل كل عمري
بشار ( على التلفون) شد حيلك شبك ! اسمع لا تتنازل شو ما هددك ز شو ما عمل معك ، انتي اليوم بتمثل الوطن و لازم تحافظ على مصالح هذا الوطن و لو كلفك هادا الشي حياتك ، تماسك و تأكد انو الشعب السوري و الجيش السوري كله واقف معك و بانتظار اشارة منك ..
حبيبي و نور عيوني سيد رؤى عبد الصمد من الاخر شو ما ضغط عليك اكتر من حدود الصنمين ما بتتنازل اوعى ياخد بالكلام و يقلك الحدود الغوطة و لا صحنايا و القدم و لا قطنا ، اكتر من الصنمين شبر واحد ما بتتنازل خليك صامد و ثابت علة مواقفك النضالية و تذكر انك حفيد خالد بن الوليد و صلاح الدين و يوسف العظمة ..اكتر من درعا و السويدا و الجزء الجنوبي من دمشق ما تتنازل و نحن معك يد واحدة حتى النصر ..و ليخسأ المعتدي عاش الوطن و عاشت سورية
( نتنياهو يصفع رؤى بشدة )
رؤى : و هي لشو كمان ؟ بشار ما طلب منك تضربني
نتنياهو : صح هي مو من عند بشار ، هي من عندي حتى تصحى من البنج
رؤى : بنج ؟!
نتنياهو : اي بنج البعث العربي الاشتراكي !!
Social Links: