يوميات دمشق – سلوى زكزك

يوميات دمشق

سلوى زكزك

البيت دكان والباب برداية والولد قاعد بالشمس عدكة الحجر وأمو عم تقصلو شعراتو…
البيت زاوية بحديقة عامة والولد مغطي إجريه بحرام الاغاثة الرمادي وأمو عم تخيطلو البنطلون الفارطة خياطتو…
البيت قبو والام بتطلع لفوق مشان تنقي العدسات ، البنت بتصرخ ماعم لاقي نضارتي..الام بتقلها طلعي..وبطرف الجلابية بتمسحلا النضارة يلي مخبيتا بالجيبة لانو البنت كل يومين بتكسر نضارة..
البيت شارع والولاد بلا ام..والشحاطة مكسور نصا والعيون معمشة والسعلة الناشفة واصلة لعند الله…
صبية عم تبيع جرابات عالبسطة، ال٦ ب٥٠٠..كل شوي بتغب غبة مي من كتر الشوب..
ختيار عم يبيع مسابح..كل شوي بيطالع المراية و ملقط الشعر وبينقي الشعرات البيض من دقنو…
زلمة عم يسأل عن دكان لبيع موازين الضغط وقلبو متل الصوص عم يخبط خبط..
بسطة مفكات وبرايز وشواحن ووصلات ..والخمسة بألف والقطعة ب٣٠٠ ورخصة وفرصة .
الشام صايرة بسطة مو معروف اولها من آخرها..
تعا قرب تعا جرب..على اونا على دوِ على تري…ويلي مو بنص الدوكة آوت..يعني برا..وممنوع التسلل……