يوميات دمشق

سلوى زكزك

يلي تغير يا جماعة الخير انو يلي كان يمد فيش لأخوه أو جاره من الطاقة الشمسية ما عاد يقدر لانو يادوب عم تنشحن البطاريات..ويلي كان يحط لجاره أو حتى لأمه كم قنينة مي باردة صار يادوب يعطيها وحدة لانو الفريزة مليانة قناني وخبز وباقي طبخة مبارح..
في عنا جيران مركبين طاقة مدري كم بطارية.(ماشالله).والبرندة بتضل مضواية عندن وعلينا..مبارح كانت مطفية وماقدرنا نسهر ع كهربتن..طلعوا مسافرين..وخسرنا ضو بطارياتهم للاسف..
يلي صار يا جماعة الخير انو يلي كان يعطي ربطة خبز زائدة لحدا ماعاد قدر لأنو الناس عم تلف الخبز بخبز..ويلي كان يبعت لقرايبه أو اخوه ٱجار البيت ما عاد يقدر لانو بظرف ست شهور بس صارت الٱجارات ٣ أضعاف .
في ناس كانت تكابر وتلوم كل حدا بيحكي عالغلا. هلق صارت تقول الوضع كارثي. في ناس عم تشتري مشمشتين ودراقة وليمونة وقرن فليفلة وبتحطن بكيس اسود مدري من العين مدري خجلا من الجيران..
مبارح في ست طلبت من جارتها تعير ها حبتين سيتامول..لأول مرة جارتها بتقلها بي بدك ترجعيلي بدالن..
مبارح في عيلة اشتروا كيلو تين..اجت الام وزعت التينات عالعدد وقالتلن كلوه بفرد مرة واقضوا شهوتكن..
يلي تغير يا جماعة الخير هو انو الكل صار عاجز حتى عن اللقمة..وميت ما بيجر ميت…