قصيده شعريه بالعامية المحكية – مقصّ… تا تدفا الدني

قزحيا ساسين

 

قبل التياب… وقبل ما الشالات

تزهّر دفا… وقبل الحرير لْ فات

عا بال إبرِه بـ إصبع الوقت الهَني

شمس الدني

أوّل مقصّ بـ هالدني

بْلا تياب شافا… ولبَّسا خيالات

* * *

دهب إيدو فاضيِه

تريّة دهب… مهما الضوّ تْلِمّ

بيضلّ يوصَل ليل عالعتمِه

…

وسنّ الدهب بالتمّ

شو زاد عاللقمِه؟

أوّل موجِه

الموجِه اللي قبلا الميّ طالت غفْوتا

البخّور يلبقلا جناح… وتنعبَد

والشمس تستحلي تغلّ بـ مَيِّتا

والبحر شافا ما مصدّق كرْجتا

ختيار… ألله حطّ عا زندو ولَد

الموجه اللي قبلا الميّ طالت غفوتا

بَعدا… قطيع الموج لاحق دعستا

بـ صدرو شويّة ميّ… والباقي حسَد

* * *

همّو عا قدّو

أُوعا تقولو: “الورد شو همّو؟”

ما بتعرفو بـ بالو شو عم بيدور

أوعا تقولو: “الورد شو همّو؟”

صدرو عا همّو مسكّر ومقهور

عطرو إلو… ومش قادر يشمّو

* * *

الغصن المسنون

ما بيقْدر الحطّاب يشقع حملتو

ويشيل شجرَه من قلب عُمرا

لَو ما عصا فرّاعتو

مْن غصون هالشجرَه

* * *

حداد بالمحبرَه

كان يا ما كان

كلمِه عا كتفا حاملِه نيسان

عم تركض… وسطح الحكي عالي

وَقْعت… وما في سطر إيدو تهَدِّيا

ولا في سطر لحَّق عا مهلو يهجّيا

وشو كان عُمرا عالحبر غالي

من يومتا عالأسْوَد تعوَّد

وبعدو لَ هلّق لابس الأسود

* * *

الحقّ قاتِل صاحبو

نحنا اللي قلنا: “الحقّ ما بيموت

ولا متلنا الشيبِه بترعا حواجبو”

مظبوط قلنا: “الحقّ ما بيموت”

بيموت عنّو… صاحبو