هلوسات مواطن ..
أسد القصار
حتما سيأتي يوم ..
كون جاية فيه من الدوام حزة الضهر .. بدي لحق آكلي لقمة ونملي ساعة قبل ما ارجع عشغلي … واتغدى عالسريع .. تفرعت … وشي انو غفيت عيني .. مافي غير اسمع صوت دقاقة الباب.. خير اللهم اجعلو خير .. مين قليل الزوق الي جاية لعنا بمتل هالوقت… فتحت الباب والا شب لابس بدلة وجرافة وحامل شنتة .. مالحق يكمل جملة مرحبا استاز .. الا وانا منبحت عليه … لك عيني انتو مندوبين المبيعات ايمتى بدكن تحلو عن سمانا..لسا مكنسة سحرية ودوا غسيل خارق ومكياج ايطالي..وما بتجو الا بهالساعة الي ما صدقنا عالله نسرقا سرقة من يومنا كرمال ننام … قاطعني وقلي عفوا استاذ شكلك فهمتني غلط .. انا وزير وزارة الأريحية وتدليل المواطن والمساج الشعبي.. تطلعت فيه .. اي والله لك من يومين شايفك عالجريدة الي لفلي فيا ابو سمعو عرنوس درة … حتى بالعلامة كنت عم تفتتح مركز لليوغا بحرستا… اهلين سيادة الوزير لا تواخزني .. العتب عالنظر والي ما بيعرفك بيجهلك.. ولو اخي المواطن خود راحتك تقبش قلبي.. اي قلي سيادة الوزير متغدي اما شبعان ببيت اهلك ؟.. لا لا عزيزي المواطن صحة عقلبك.. انا جاية مخصوص كرمال اسالك .. بخصوص شو ؟ …كيف نفسيتك ؟ مرتاح ؟ .. ماشي الحال الحمد الله .. طيب سيادة المواطن وزارة التخطيط عم تفكر تغير الوان الشوارع فعم ناخد راي العالم فشو اللون الي بتحبو سيادتك …. بردقاني مموه بسيرقوني ازاممكن ؟ اي ممكن تشكل اسي ليش لاء..طيب بخصوص دور المساج والاسترخاء الحكومية الي فاتحينا مشان نريح اعصابكن عم تروح ؟ لا والله بعيدة عليي بدي اخد تلات سرافيس لاوصل … شو هالاهمال هاد والله ما بقبل .. من بكرة خبير مساج بوصل عباب بيتك .. مافي لزوم يا وزورتي ( دلع وزير ).. لا والله لا تخليني احلف بالطلاق اخي المواطن .. طيب متل مابدك لاتزعل… غيرو اخي المواطن .. سلامة عمرك .. طيب يالله بخاطرك .. مع السلامة سيادة الوزير …. سيادة الوزير سيادة الوزير معليييييييم … اي ضي عيوني اخي المواطن بدك شي ؟ … اي والله بس مستحي … ولو تفضل .. في مجال تنزل معك هالكيس تبع الزبالة .. صرلو من الصبح جنب الباب ومتكسلن شيلو … ولو .. غيرو تدلل نشرتوا الغسيل اما لسا … لا روحي من شوي نشرنا .. خلص سلامتك … تيسر انتا عشغلك … ودير بالك من جارتنا ام صبحي الي فوق ترى مجنونة وبتعض ها .. اي اي رح دير بالي يالله بخاطرك .. الله معك سيادة الوزير تعا كل يوم.
Social Links: