#شو بخبر الياسمين ؟! – اسد القصار

#شو بخبر الياسمين ؟!
(قصيدة باللهجة المحكية)
شو بخبر الياسمين ؟
عن ظلم بربوع الوطن !
عن عُمرْ خالي من الفَرَح !
كلو أسى وكلو مِحَن
عن شام كاسيها الحزن !
عن حلم حرية وكرامة
صرلو سبع سنين !!
#شو بخبر الياسمين ؟!
عن عين دابت بالسجن
خلف الأسر والمعتقل !!؟
عن دار راحت بالقصف
لأجل الزعيم يظهر بطل ؟!
عن شعب .. مدمَّيَ الجبين
جوا الوطن .. هم نازحين !!
برا الوطن .. هم نازحين !!
#شو بخبر الياسمين ؟!
عن ثورة متنا لأجلها ..
تعلى وتشعع رايها ..
وتشرق شمسها عالوطن
ونسمع لحن من نايها !!
باعوها بأسواق النخاسة
مرة باسم المصلحة
ومرة باسم الدين
شو بخبر الياسمين ؟!!
رح خبر الياسمين …
إنو الشعب ما بينهزم ..
وعالثورة باقي ما ندم
رغم الجراح رغم الألم ..
صامد متل نور الصباح
يشرق بنورو عالعتم
قدرك يا شعبي هوة .. هالثورة
دمك ولحمك هية .. هالثورة
سجدة بصلاتك هية .. هالثورة
علم ولادك انو .. بالثورة
وبالثورة بس.. بزهر الياسمين !!
….
أسد القصار
١٩/١٢/٢٠١٧
ألمانيا – مدينة فرايبورغ