طلع اصلنا يهودي !!
رؤى عبد الصمد
(مسرحية قصيرة )
(مشهد ١ )
(أبو عبدو رئيس عشيرة شنارين في منزله مع أبو جاعود شيخ عشيرة التغالبة )
ابو عبدو : و الله يا بو عبدو ماني عارف كيف بدي لقمك ياها ، الموضوع مو سهل ، بس قلت لحالي تسمعها مني أحسن ما تسمعها من غير ، خوش نحنا صحاب و حبايب
ابو جاعود : خير ان شاء الله أبو عبدو ؟ و الله خوفتني شو في بالله ؟
أبو عبدو : يا أخوي أبو جاعود أنا جبتك لهون لأني عارف أنك زعيم و رجال عشيرة التغالبة ، و انتي زلمة فهمان و واعي و بتقدر تفهمني مظبوط
ابو جاعود : طيب خبرني شو في ؟
ابو عبدو : انتي بتعرف الخبير الالماني هنري ، و كيف أنه أجا خصوصي عا المنطقة حتى يكشف على أصل عشيرتكم
أبو جاعود : إي طبعا” و أجا لعنا عالبيت و قابلنا و صورنا و أخد تحاليل دم و شجرة العيلة ..نحنا معروفين يا أبو عبدو أصولنا من زمان نحنا جدنا كان الزير سالم الله يرحمو
أبو عبدو : تعيش ، طبعا” كل الناس بتعرف هادا الشي بس و الله يا بو عبدو ماني عارف كيف بدي أقلك ، الخبير عبيقول غير ها الحكي
ابو جاعود : أعوذ بالله !! شو غير هالحكي ؟
ابو عبدو : قال أنتو اصلكم ياهودي .
أبو جاعود : شنو ؟ ياهودي ؟! ها الابن الزانية ، نحني ياهود ؟ و الله ما حدا ياهودي غيرو ها الابن الكلب ،
ابو عبدو : لا تعصب يا ابو جاعود ، الخبير ما جاب شي من عنده ، عنده وثائق و مستندات و تحاليل مدري اش اسمه د ان آ مدري شو هادا لسا أقوى من تحليل الدم
أبو جاعود : وثائق يروخ يدحشها ب (…) شو على كيفو !! نحنا اصلنا تغالبة غصب عن اللي خلفه ، وينو دخلك هالكلب صرلي يومين ما شفته ؟
-و الله هوي خايف يقابلكم حاسب هيك شي فعطاني الي الوثائق سلمكم ياها
-لا بدي وثائق و لا بدي شي ، بدي بس أشوف ها الابن الحرام و أفرجيه لها الكلب قيمته و أفرجيه مين الياهودي نحنا و لا هوي
(مشهد ٢)
(في منزل أبو جاعود وجهاء العشيرة مجتمعون يناقشون الأمر )
رجل ١: و الله يا عمي أبو جاعود ما النا غير نطخه لها الياهودي الكلب .. للألماني و هيك بنخلص من ها الفضيحة
رجل ٢: بالعكس هيك الفضيحة بتكبر و بكتبو عنها بالصحافة ما النا غير نجمع اله كم قرش و نعطيه ياهم بغير النا نتيجة بحثه و إذا بدكم بنزيدهم قرشين و بخليه يسجلنا من النسل الشريف يعني من الهاشميين ،
رجل ٣: شو عبتحكي يا أخي ، هادا الماني إذا بتقطع رقبته ما بيرتشي و لا بغير كلامه
(يطرق الباب )
ابو جاعود : تفضل ادخل
(يدخل شرطي )
الشرطي : السلام عليكم
الجميع : و عليكم السلام
الشرطي : انتي عرفت يا ابو جاعود نتيجة بحث الخبير الالماني مو هيك
الجميع : كذاب ، هاد واحد كذاب كلب مو صحيح ..
الشرطي : واحد واحد يا حمير ، خليني احكي مع أبو جاعود
ابو جاعود : و الله يا حضرة الشرطي انا ما أقدر أخالف رأي العشيرة
الجميع : تعيش ابو جاعود ، تسلم أبو جاعود ..
الشرطي : لك يا بكم خليني احكي و أفهمكم ، هادا الألماني باعتينه ليشوف أصلكم ياهودي و لا لأ
الجميع : لا لأ لأ
الشرطي : الله ربي مع ها الحمير ، لك اسمعوا ، بناء” على ها النتيجة المانيا رح تبعت لكل واحد منكم 2000 يورو
ابو جاعود : 2000 شو ؟
الشرطي : يورو ، عملة ألمانيا يعني شي مليون سوري لكل راس كر فيكم ، صغير و لا كبير و لا مقمط بالسرير ، يعني اغتنيتو يا بكم
الجميع : الله حيو الله حيو الخبير ..تعيش ألمانيا ياه ..
الشرطي : قال هاي تعويضات عن المحرقة اللي صارت بحق اليهود بالحرب العالمية التانية
رجل ٤: بس درسونا بالمدرسة أنو هاي المحرقة كدبة و ما صارت
الجميع : اخرس ولك ، انتي شو فهمك ، صارت كيف ما صارت
رجل ٢: أنا و الله كان قلبي محسسني أنو أصلي ياهودي ، يا أخي و الله هالفلسطينية ما معهم حق ، كيف هيك بفجرو حالهم بالياهود يا حرام
رجل ٣:قال شو قال انتفاضة ، فوق ما الياهود حامينهم و عايشين مكيفين أحسن من كل الدول العربية لسا مو عاجبهم
أبو جاعود : انا أصلا” اسمي ابو جاعود قريب على أبو ياهود ، هيك أنا بحبهم من قلبي من زمان
( يطرق المنزل )
ابو جاعود : تفضل
(يدخل ابو عبدو )
ابو عبدو : هاي أنا يا أبو جاعود جاي أخلص ضميري ، بدي أسلمكم الوثائق و انتو تصطفلو
أبو جاعود : استلمناها أبو عبدو لا تاكل هم نحني أصلنا ياهودي صحيح ، تأكدنا من هادا الشي
أبو عبدو : بس الوثائق لسا معي كيف تأكدتو
أبو جاعود : حضرة الشرطي قبل شوي جبلنا ياهم
أبو عبدو : الشرطي ؟
أبو جاعود : إي ، ألفين يورو يا أبو عبدو هادا أكبر دليل و أكبر وثيقة صحيح و لا لأ يا شباب ؟
الجميع : معلوم !! نحنا أصلنا ياهودي …و لو !!!!
الشرطي : انتبهوا يا جماعة شوي و عطوني ادنكم ، في شغلة الخبير كاتبها بتقريره ، عبيقول انو ، اكرم الطسمة ما بيطلعله شي مز المصاري ، لانو اكرم الطسمة اصله من عشيرة تانية و اجا احتمى فيكم و صار من عشيرتكم ، يعني دمه مو من دمكم ، يعني اصله مو يهودي و ما بيطلعله مصاري
(الكل ينظر تجاه اكرم الطسمة )
اكرم الطسمة : من وين جايب ها الحكي؟! ، انا ياهودي ابن ياهودي غصب عن اللي بيريد و اللي ما بريد !!
Social Links: