من حوارات منكوب و منهوب
عمران كيالي
…… (28) ……
……منكوب : أنا أفكر بالعودة إلى البلد .
منهوب : إي، بس مو لازم تتأكد بالأول أنو بيتك ما انقصف أو حدا استولى عليه .
منكوب : فرضا ما انقصف و ما حدا استولى عليه .
منهوب : اتصل بحدا بتعرفه من أهل الحارة يشوف إذا ما نهبولك العفش .
منكوب : فرضا ما حدا نهب العفش .
منهوب : خلي حدا يشفلك مسؤول يتأكد أنو اسمك غير وارد بلائحة ال3ملايين مطلوب .
منكوب : إي، و بعدين .
منهوب : بعدين، ابنك سامر مطلوب ع الخدمة الإلزامية، شوف حدا يضمنلك ما يدقو فيه ع الحدود .
منكوب : إي، و غيرو .
منهوب : شغلك ! يعني شلون بدك تعيش ؟ عجب فصلوك من الوظيفة و جابو غيرك ؟ عجب ورشتك تدمرت أو انتهبت ؟
منكوب : إي و الله ذكرتني شلون بدي أعيش إذا راحت الورشة ؟
منهوب : بعدين حسوب حساب تشابه الأسماء، يعني إذا بيتك موجود و الورشة موجودة و حليت مشكلة عسكرية ابنك، بس كمشوك بتشابه الأسماء مع واحد من القاعدة، يمكن تنفد بشهرين أو كلاته و يمكن ما تنفد خالص .
منكوب : يا لطيف … خيو … أنا رح أعود حالي على وجع الغربة و عذاب الحنين … و إلي الله …
Social Links: