يوميات دمشق

سلوى زكزك
– شوفير الباص الاخضر بدو دوا ضغط تيلمي ٨٠..
– شوفير السرفيس بدو دوا للسكري ومفقود..
– شوفير التكسي بدو دواء للكلاوي ومفقود.
-الصيدليات الفاتحة كلها طوابير ناس بدها دواها…
– بساحة التجارة الساعة٤ عصرا عيلة بيبيعوا خضرا.. اشتروا – سندويشة فلافل ب٨٠٠..فلشوها وعملوا منها ٣سندويشات بعد ماوزعوا الحشوة ع ٣ ارغفة خبز من ربطة الخبز تبعن.
..بنتهم الصغيرة ترجتهم يخلولها الرغيف الاصلي لانو فيه طعمة…
– زلمة ختيار عند مديرية التربية طلب من سيدة شراء علبة حلاوة ( قلها نص كيلو بيكفي الله يخليلك اهلك) لانو دايخ ومعو نقص سكر ومن مبارح ما اكل شي…
– في شب عطى زلمة علبة سيتامول مجانا..الزلمة قلو الحمد لله رجعلي حقي..طول عمري بوزع خبز ببلاش عالفقراء..
– عند مشفى الهلال سيدة عم تقول لزوجها الحمد لله طلب شوربة قبل مايموت وعملنالو ياها على فخد جاج واكل وشبع..