من حوارات منكوب و منهوب (14) ..

حلب تتدمر .. عمران كيالي 

منكوب : سمعت اليوم من واحد صحفي أنو الكاتب (حسن س) طقت فيوزاتو من شدة حزنو على حلب ..

منهوب : لا تستغرب هالحكي .. أنا قلبي محروق على سوريا كلها .. بس إش طالع بإيدنا .. ولاد الحرام خربوها ..

منكوب : كمان قال إنو من شهر ما كتب و لا كلمة، و عم يحكي شندي بندي .. يعني خلص، عقلو صار بالباي باي ..

منهوب : كمان لا تستغرب، كل الناس عم تحكي مع حالها ..

منكوب : إي .. و بعدين ؟..

منهوب : إش يعني ؟..

منكوب : إيمتى رح تخلص هالقصة ؟..

منهوب : قربت .. قربت ..

منكوب : دي بآآآ .. لا تساوي متل عبد المجيد ..

منهوب : عن جد قربت ..

منكوب : شلون يعني ؟..

منهوب : يعني دوام الحال من المحال، و كل شئ إلو نهاية ..

منكوب : و الله أنا شايف إنو نهايتك رح تكون على إيدي .. منين عم تسمع هالحكي؟..

منهوب : من الآذن تبعنا في الشغل ..

منكوب : هلق الآذن تبعكن صار محلل سياسي ؟..

منهوب : أوووو .. محلل سياسي و ثورجي و شاعر و فيلسوف .. متلو متل رفقاتك ع الفيسبوك .. و بعدين ليش مستغرب، القصاب أبو محمود صار قائد لواء ..

منكوب : و الله غلبتني يا منهوب .. بس بسيطة .. الحوار الجاي رح أطالع الفرق .. و أفرجيك نجوم الضهر ..

منهوب : إي سييييدي، نجومك شقد ما كانت قوية أرحم من الفوسفوري …