شعر فراتي
مطر ناعم غسل دنياي
غسل حلمي العمتّه اسنين
خذاني بغربتي ولهان
يمرني ضيف مستعجل
يعاتب كل خلايا الروح
بحمل رمشي بنظر يرثيك
مثل كت الجرف عالماي
يدب باشواقي غرقانه
مطر ناعم
يدق بابي بلا منّه
مثل طير الصحارى يزور
نبع صافي وعرق جنّه
خذتني الروح لادروبك
وعلى السدة
لقيت احشايَ ممتده
تصيح دروبي لك ناطور
لَمني جرحي من صادوك
بهذيك الروفة يافلانه
ندى بشفتي ورطب حالم
وانت عالم رغبة ٍ بيك
لشهد باشفافي ولعانه
وعلى شفافك عنب مقطوف
بهذيچ السهره ريّانه
مطر ناعم
فتح طاقة
نزل صدري و هدل زيقي
بَرَد ابيض
طبع باثيابي رمانه
مطر ناعم وحلم دايم
اجيك بحلّة معرْسين
يضل ليلي بجفى غيابك
تصك اسناني بردانه
دفّيني بحموٍ بيك
بحنو روحك ولا تزعل
ولا اقبل,,,
اذا ما تضمني زعلانه
د تركي درويش (سلامه)
Social Links: