عمران كيالي
منكوب : تعا ننسى إنو الشتوية دخلت علينا و ما في بالبيت ماظوط …
منهوب : تعا ننسى إنو المختار رفض يعطيني 25 ليتر، و قللي إما 200 ليتر أو ما إلك حصة، و منين بدي أجيبلو 38 ألف حق ال200 ليتر ؟…
منكوب : تعا ننسى إنو أربعة أيام عم أدور على جرة غاز من قرنة لقرنة، و ما لاقيت …
منهوب : تعا ننسى إنو صار إلنا 5 سنين بلا كهربا …
منكوب : تعا ننسى إنو راتبى كلو ما بيكفي نص أمبير …
منهوب : تعا ننسى إنو كل عشرين يوم بتجي المي لمدة نص ساعة …
منكوب : تعا ننسى إنو صرنا نشوف اللحمة بالمنام …
منهوب : تعا ننسى إنو قنينة الزيت النباتي أقل شي حقا 850 ليرة …
منكوب : تعا ننسى إنو بروح ع الشغل مو عرفان حالي رح أرجع أشوف مرتي و أولادي مرة تانيه …
منهوب : تعا ننسى إنو العفش انسرق …
منكوب : تعا ننسى إنو البيت انخرب …
منهوب : تعا ننسى إنو ملايين من النازحين هون و برا …
منكوب : تعا ننسى إنو مئات الآلاف من الضحايا …
منهوب : تعا ننسى إنو مئات الآلاف من المعاقين، هادا بلا إيد و هادا بلا إجر …
منكوب : تعا ننسى إنو في آلاف المعتقلين …
منهوب : تعا ننسى إنو مئات الآلاف عايشين بالمخيمات …
منكوب : تعا ننسى إنو جميع النشاطات الإقتصادية في البلد تحت الصفر، عدا السياحة العسكرية …
منهوب : تعا ننسى إنو حدايقنا تحولت لمقابر …
منكوب : تعا ننسى إنو الفساد زاد …
منهوب : تعا ننسى إنو المرحوم ملحم بركات غنى هالغنية …
منكوب : تعا ننسى مين نسانا أسامينا …
منهوب : تعا ننسى كل شي و نحب الحكومة …
منكوب : تعا قوم معي قبل ما ننسى …
منهوب : لوين ؟…
منكوب : نشكر المحافظ لأنو نسي يعطينا رخصة البراكة …
منهوب : تعا ننسى إللي نسيونا
منكوب : إنس الموضوع، خليك هون و كمل البرتيه …
Social Links: