……. فراتي …….
عذرا للالم وقليلا من الحب …..
يمر بينه
الوقت حاير
وعلى جروفك جمر جرني
بغضى ضلوعي شهب ولعان
وعلى عيونك زمن ناظر
وحيد امشي على ارمالك
يها التسحرني بعيونك
واتيهن بيك
اشرّعلك بيابي العين
انثرلك ورد روحي
نسايم هيل
وحچايا ايامنا الولت
وانت ناطر
على دروبي
شفت ضيم البعد نايم
وسط حوم الخلق حيران
وانت راحل تذل دنياي
مثل نجم الصبح مزهور
بوسط ليل المحب حاير
عسى ارموشك يها الناجي
تباركلي هيامي البيك
يساهي بسهوتك عني
تمر بيني
وعطر روحك سباني ايام
وانا المغروم باوصافك
خذاني الشوق
غربني بعشق عابر
نذرت الك نجوم الليل
شهب تضوي بمناديلك
وعلى خدودك قمر ضاوي
رسم شفتك قطار يصيح
على السكة عنب قاطر
يامدلول الدلال انت
العشق انت
يَ ماي العين صبح نادي
على اخدودك نذر مصيود
وعلى اهدابك ورد ذابل
وانا الرّايح
حدر زيج الصدر دايح
شهد خذني بصحارى الروح
على مودك سحر قادر
يا محبوبي،،
البخت دلني على الواحة
بحدر جيدك
نضج باعيوني تفاحه
وعنب لولي وعنب فاضح
يداويني بعفى الراحه
انا الهايم على ضفافك
وانا النايم
وسط طوف الفرح عايم
ألِف حلمك مع احلامي
وعلى الروفه
اخاطر بيك
يَ غافي بروحي مرتاحه
تمر بيني
يامجنون العشق باتع
وعلى الغفله
تضم اشجاني واستسلم
اجن ن بيك
اشيلنك على اجفوني
بطرف رمشي اغطنّك
وانا المصلوب حدر زيجك
واتيهن بيك
واعيشاً من زوايا الموت
لقيتك شمعة لايامي
يَ خوفي مني يطْفونك
ولا ظنتي الخلق بعدك
ضوى تضوّي عتم ليلي
تعلمني
اخط اشواقي حيرانه
بزهو لونك واضل افديك
يها الوادع زمن وازع
خدر نومي
ي شاري احلامي واهمومي
وبخت ضايع
انا الردتك سند مرساي
حسافة من ايدي خاويتك
تغربنا بحنين الشوق
وانا بليلي اريد القيك
لا ماي العشق سابح
ولاشاطي انتسبح فيه
ولا مرسى بصفى عيونك
ياجوري من رسم لونك
وانا المجنون من شمّك
اخاف عليك من روحي
واخاف اعداي يؤذونك
يا مجنون الغزل انت
الفرح باعيوني من هامت
عليك الدنيا فرحانه
وعلى هموم الحزن نامت
يامجنون الغزل انت
الفرح انت
اريدك نجمة لايامي
واريد اعداي ينسونك
…. سلامه …..
اذار 2014
Social Links: