اسباب التشرذم الحاصل بين السوريين – ابو صلاح صلاح 

ابو صلاح صلاح 

دعا احد العقلاء السوريين مجموعة من أصدقائه 

إلى اجتماع ليحددوا اسباب التشرذم الحاصل بين السوريين كي يضعوا حلا له فكان هذا الحوار :

ابو عبدو : أنا برأيي سبب هالبهدلة والذل هو بعدنا عن الله وتركنا لديننا 

والحل هو بالعودة إلى الله سبحانه وتعالى .

رد الجميع بصوت واحد :

إي والله يا ابو عبدو حطيت ايدك ع الجرح هاي هي العلة يسلم تمك يا ابو عبدو

قال ابو محمد : العلة عرفناها بس الدوا ماعرفناه

يعني كيف بدنا نرجع لديننا ولربنا ؟ على اي طريق ؟

رد ابو حسين : بسيطة منرجع لتطبيق كتاب الله وسنة نبينا 

قال ابو عزو : هذا هو الصح بس عنا سبعين مذهب وسبعين فقه وسبعين تأويل 

ولحالنا مامنقدر نأول فأكيد بدنا مذهب نقلده 

ابو خالد : صحيح بس إينا واحد منن هو الصح ؟

ابو مصطفى : خيو مافي اصح من جماعة السلفية هدول مافي عندهم لف ودوران كله من الكتاب والسنة 

ابو خليل :

بعد كل شي عملوه بينا لسا لاحقلي اياهم ؟

لا لا أنا رأيي نتفق على اتباع مذهب الصوفية. 

ابو احمد : يا حبيبي !!!!

بدك يانا ننهبل ؟!

انا برأيي الأشاعرة هنن افقه الناس بالدين 

ابو رضى : استغفر الله العظيم 

هدول الأشاعرة هنن والمرجئة نفس التطبيقة هدول هنن اللي خربوا بيوتنا وطبلوا للحكام وزمرولن .

أبو صالح : خيو انا برأيي إنه الموروث الديني كله التعب فيه ودخله دس فليش ما نرجع لكتاب الله اللي ماحدا قدر يزوره وهو واضح و مفهوم .

ابو محمود : إيواااااا …. قلي إنك من القرآنيين الجماعة الضالة وبدك نلغي كل التاريخ الاسلامي ؟!

والله ان قمت عليك لكسر راسك يا….. .

يتدخل أبو منذر قائلا : 

صل على النبي خيو نحنا جايين نتناقش مو نتقاتل .

أنا برأيي مستحيل نتفق على مذهب بهذا الشكل لذلك رأيي تتركوا الله والدين من السنتكم 

و كذبكم ونفاقكم 

و الله مو بحاجة لحدا ينصره او ينصر دينه 

الجميع بصوت واحد :

ولك العمى بعيونك العمى ! .

بدك يانا نترك الله والدين ياعلماني ياملحد ؟؟؟! 

أبو منذر : لا ياجماعة فهمتوني غلط أنا مابدي حدا يتاجر بالدين …

الجميع : أففف وعم تقولها بوقاحة كمان ؟؟؟!

ليش في أحسن من التجارة مع الله يا ملحد ؟؟؟

أبو منذر : انتوا فهمتوا التجارة مع الله غلط 

التجارة مع الله هي انك تساعد عباده اللي مو قادرين يأمنوا قوتهم وماتستغل حاجتهم لحتى تزيد ثروتك

التجارة مع الله انك تغيث الملهوف وتساعد الضعيف و تحافظ على كرامته مو تذبحه وتسلخوا وتسرقه وتنتهك عرضه بإسم الله والدين ….

عندها صاح الجميع بصوت واحد : 

خيو مافي احسن من مذهبي 

و شكلين مابحكي 

واللي مو عاجبو مذهبي ينطح الجبل ويبلط البحر .

ولا زال الجميع في نطاح مستمر والجلسة مفتوحة والتشرذم في ازدياد إلى ان يشاء الله ويعلمنا أدب الحوار واصول الاختلاف ثم يوحد صفنا وكلمتنا .

من صفحة الصديقه صفيه الدغيم