كــــذاب ــ د.تركي درويش (سلامة)

 

… فراتي …

.

ماهگيتك

تِنْتزِعْ صَمَّام گلبي

وانت لگليبي نذر

ولاهگيتك تنسى حبنا

ولا هگيت عيوني تنسى

 كل سهرنا

 وكل محطات العمر

ولاگحط يِلگاك دَمْعَهْ

ولامَزِن يروي عطشنا

ولامطر غسَّل عشگنا

ولاحزن مرهون باحزانك يُمُر

تچذب علَيْ واهواك

وآنا بغربتي

 مثل الفرخ مذبوح

والذَّابح خبر

گلت انتظر للصيف

وكل صيفي يمر

 مثل اليعبر الماي

 وسنسولَهْ خطر

تذكر بذاك الليل يَمْ ذاك الجرف

كان الوفى حچايات

 واحضينك دفى

يلَمْلِم سليل الروح

يالْروحك گهر

وانا غريگ هواك روجة وتنطفي

كلما تبوس الگاع

يودِّعها النهر

چَمْ ارْسمت أحزان بادْموع الشَّمع

فوگ الرّمل مصلوب

 والگلب انفطر

خليتني بكل ليل أندب حالتي

قاعد أعد نجوم

 غض نومي السهر

 چان الوجع ويّاك

 إنت بعلّتي

 وآنا العليل اهواك

 والشَّافي رحل

ترسم فرح وتگول

ضمني بحيرتي

انا ظلال إحروف باكتابك خبر

جُرْني بِشَبَك يِمـْناك

كلّي بحلتي

مثل الحلم لو طاف

حوريّهْ ابَّحر

تچذب تگول اهواك

 إنت الْصدْتني

وآنا سمك مربوط

 باشباكك عَثَر،،،

.

… سلامه …