من حوارات منكوب و منهوب ( 15 ) ..

عمران كيالي 

منكوب : وينك لهلق ؟.. تأخرت كتير ..

منهوب : إي مو بتعرف الروتين .. المعاملة تبعي : جيب وراق و طلاع دراج .. روح و تعا .. بالأخير : معاون المدير مو هون ، رجاع بكرا ..

منكوب : علقة وخمة ..

منهوب : و أنت إش صار معك منشان المعونه ؟..

منكوب : قال بدهم يطلعو كشف ع البيت .. إذا شافو أكتر من فرشتين ما رح يطلعلي معونه ..

منهوب : مو معقول هالحكي ..

منكوب : إي يعني .. بدهم يدققو و يحققو و يسألو .. و يحطو بإنفا عودة ..

منهوب : المهم تظبط بالأخير ..

منكوب : منقول إن شاء الله .. بركي بيطلعلنا قنينتين زيت نباتي .. لأنو صار لي جمعتين مشتهي على أكلة مقالي ..

منهوب : يا سيدي بكرا إذا خلصت معاملتي بعمل مخبص و بخبرك ..

منكوب : إن شاء الله .. بس شوف أنا ما بحسن بلا الفليفلة الحدة ..

منهوب : بسيطة .. مو مشكلة ..

منكوب : يا زلمة صرنا نحمل هم كل شغلة : تأمين الخبز، تأمين الماظوط، تأمين الغاز، الخضرة، المواصلات، كل شي، كل شي ..

منهوب : عيفا على ربك أحسن شي ..

منكوب : إي شو بدو يتحمل الله ليتحمل ..

منهوب : لا .. حرام .. ما بيصير تحكي هيك حكي ..

منكوب : هلق اللي عبصير فينا مو حرام إنت التاني ؟..

منهوب : خلي إيمانك قوي .. الشغلة بدها صبر ..

منكوب : صبرنا صار صبر و مر، و عيشتنا صارت قهر ..

منهوب : هدي معلم .. شو باك ؟..

منكوب : صحيح إش أخبار المعلم ؟.. صارلو زمان غيطط .. لا حس و لا خبر ..

منهوب : الله أعلم ..

منكوب : عجب مرضان ؟ صاير عليه شي ؟..

منهوب : ما بعرف .. أصلا ما عنا وقت نفكر بأحوال البلد .. يا دوب عم نحسن نأمن معيشة الولاد و مصاريف الحياة ..

منكوب : قولتك .. أحسن شي نلعب زهر .. إش رأيك ؟..

منهوب : هات الطاولة .. اليوم بدي آخدك ع الصفر ..

منكوب : ما خرجك ..

منهوب : يعني كنت عب تتمرن بغيابي ؟..

منكوب : هلق بتشوف .. خود .. هاي جهار يك ……

شرح الكلمات :

– وخمة يعني وسخة

– يحطو بإنفا عودة يعني يعقدوها و يصعبوها

– بركي يعني ربما

– مخبص يعني مقالي مشكلة ( بانجان،بندورة،بصل ) و بقدونس

– غيطط يعني غارق في النوع تأتي بمعنى غائب

– يا دوب يعني بالكاد ……