الفقرة ( 18 ) من حوارات منكوب و منهوب ..

عـمـران كـيـالــي

منكوبة : ما حكيتيلي إش صار مع بنتك عبير ..

منهوبة : إش قصدك ؟..

منكوبة : قصدي حددتو العرس ؟..

منهوبة : إي سكتي .. مو تفركشت الشغلة ..

منكوبة : له .. له .. شلون .. بالله حكيلي ..

منهوبة : يوم اللي نزلنا ع الجهيز .. طلع كل إللي معو ما بيشتري جرابات لبنتي ..

منكوبة : له .. له .. معقول .. مو على أساس هو موظف عند الحكومة و ضروب طراح ..

منهوبة : إي موظف .. بس ما بيبلع .. يعني أندبوري ..

منكوبة : وخ .. وخ .. إي ليكو جوز أختي موظف ما شاء الله و كان .. عندو بيت و سيارة بتاخدو و بتجيبو .. و إش سهرات برا و إش جخ و رخ ..

منهوبة : إي .. بس أصابيعك ما كلها سوا ..

منكوبة : صح يا مو .. الظاهر إنو خطيب بنتك درويش و على نياتو ..

منهوبة : ما اختلفنا .. بس اللي بو يشتغل جمال يعلي باب دارو .. الجازة مو لعب و بدها هز كتاف ..

منكوبة : و الله أنا بقول إنو بهالأيام الصعبة و هالغلا، مال قارون ما بكفي العيلة .. و الله يعين الشباب اللي بدهن يتجوزو ..

منهوبة : الله يعين كل حي على بلواه ..

منكوبة : و إذا ضل الوضع هيك، كل البنات رح تعنس ..

منهوبة : إي منيح أنا و إنت نفدنا ..

منكوبة : يلعن أبو هالنفدة .. جوزي منكوب و جوزك منهوب .. و بدنا عليهم صبر أيوب ..

منهوبة : يعني قولك نجوزها للبنت ؟..

منكوبة : لك إي جوزوها .. أحسن ما تضل بخلقتك .. الشب بس تكون صحتو و عافيتو عليه .. الفقر مو عيب ..

منهوبة : بس شلون بدي إقنع جوزي ؟..

منكوبة : بسيطة .. اليوم بعد العشا، نامي بالغرفة التانية مع الولاد ..

منهوبة : رح ينزعج مني ..

منكوبة : لا .. بالعكس .. رح يفرح تاني يوم، لما يشوفك جنبو و كتافك مبينة، و رح يوافق على كل طلباتك .. سأليني أنا ..

منهوبة : العما شقدك وحده عفريته .. لازم يحطوك مع الوفد المفاوض في جينيف ..